Azərbaycan, Bakı, 14 oktyabr /Trend, müxbirlər M.Əliyev, N.İsmayılova/
Cari ilin səkkiz ayının yekunları üzrə İqtisadi İnkişaf Nazirliyi yanında Sahibkarlığa Kömək Milli Fondunun (SKMF) maliyyələşdirdiyi layihələrin 99,8 faizi ölkə regionlarının payına düşür. Bu barədə iqtisadi inkişaf naziri Şahin Mustafayev Milli Məclisin plenar iclasında 2011-ci il dövlət büdcəsi layihəsinin müzakirəsi zamanı bildirib.
"Belə tendensiya bundan əvvəlki illərdə də müşahidə olunub. Ölkənin hər bir rayonunun iqtisadi potensialı dərindən öyrənilir, onun inkişafının prioritet istiqamətləri müəyyən edilir və rayonda mövcud olan ehtiyatlara uyğun olaraq İqtisadi İnkişaf Nazirliyi tərəfindən müsabiqələr yolu ilə, xüsusilə, iri layihələrin maliyyələşdirilməsi həyata keçirilir", - Mustafayev deyib.
Nazirin sözlərinə görə, SKMF bir il ərzində ölkənin bütün rayonlarında sahibkarlıq fəaliyyətinin inkişafı üçün tədbirlər keçirib. Bununla yanaşı, ümumrespublika tələbatı aşkar olunur, bunun nəticəsində xüsusi proqramlar işlənib hazırlanır və maliyyələşdirilir.
"Bu gün Azərbaycanda artıq taxıl anbarlarına ehtiyac yoxdur, ümumi gücü 266 min ton olan anbarın tikintisi üzrə 16 layihə SKMF tərəfindən, gücü 160 min ton olan iki layihə isə Dövlət Taxıl Fondu tərəfindən maliyyələşdirilib", - nazir bildirib.
Onun sözlərinə görə, SKMF həmçinin ümumi gücü 70 min ton olan 23 soyuducu-anbar kompleksinin tikintisini maliyyələşdirib. Bu anbarlardan 7-8-i şimal regionundadır.