Azərbaycan, Bakı, 18 oktyabr /Trend, müxbir N.İsmayılova/
2010-cu il oktyabrın 1-nə Azərbaycan bankı "Texnikabank"ın aktivləri sentyabr ayı ərzində 0,9 faiz artaraq 472,94 milyon manat təşkil edib. Aktivlər üzrə gəlirlilik (ROA) 1,77 faiz, kapital üzrə gəlirlilik (ROE) isə 13,47 faiz olub.
Bankın nizamnamə kapitalı 53,685 milyon manat, məcmu kapitalı isə 63,74 milyon manat təşkil edib.
Sentyabr ayı ərzində bankın depozit portfeli 3,8 faiz artaraq 219,2 milyon manata, o cümlədən fiziki şəxslərin əmanətləri 168,27 milyon manata çatıb. Bankın ümumi öhdəlikləri 393,44 milyon manat səviyyəsindədir.
Bankın kredit portfeli 0,9 faiz azalaraq 313,95 milyon manat təşkil edib ki, burada problemli kreditlərin payı (ödəniş müddəti 90 günü ötən) 5,17 faiz (16,22 milyon manat) olub. "Texnikabank" 31,63 milyon manatlıq istehlak krediti verib.
Hesabat dövründə bankın gəlirləri 46,42 milyon manat, eləcə də faiz gəlirləri 36,5 milyon manat, faizsiz gəlirləri isə 9,91 milyon manat olub. Bankın xərcləri 38,19 milyon manat təşkil edib.
Oktyabrın 1-nə bankın xalis mənfəəti sentyabrdakı 4,46 milyon manata nisbətdə 8,21 milyon manat olub.
Avqustun əvvəlində bankın aktiv plastik kartlarının sayı 46 652 ədəd təşkil edib. "Texnikabank" ölkədə 57 bankomat, 207 POS-terminal quraşdırıb. Bankın 35 filialı və beş şöbəsi var.
"Texnikabank" ölkənin bank bazarında 1993-cü ildən fəaliyyət göstərir, 2007-ci ilədək 100 faizli Azərbaycan bankı olub. Bu gün bankın majoritar səhmdarı kimi "World Wines" şirkəti çıxış edir. Şirkət bankın səhmlərinin 75 faizinə sahibdir. Bankın Müşahidə Şurasının sədri Etibar Əliyev səhmlərin 15 faizinə, ABŞ-ın "Kazimir Investment Caspian Fund" holdinqi isə səhmlərin 10 faizinə nəzarət edir.
Oktyabrın 18-nə olan rəsmi məzənnə 0,8015 AZN/USD təşkil edir.