Azərbaycan, Bakı, 26 oktyabr /Trend, müxbir A.Axundov/
Beynəlxalq Sığorta Şirkəti (BSŞ) yerli bazarda artıq mövcud olan sığorta növləri bazasında yeni məhsulların yaradılması imkanlarını nəzərdən keçirir. Bu barədə çərşənbə axşamı şirkətin idarə heyətinin sədri Feyruz Novruzov deyib.
"Bizim beşi icbari olmaqla 37 növ sığorta xidmətinin göstərilməsinə icazəmiz var. Hələ ki yeni növlərə icazə alınmasına ehtiyac yoxdur. Artıq mövcud növlər üzrə yeni məhsulların yaradılmasını nəzərdə tuturuq", - Novruzov qeyd edib.
Onun sözlərinə görə, şirkət tərəfdaş banklarla yeni, birgə məhsulların yaradılması ilə bağlı danışıqlar aparır.
"Şirkət Azərbaycan Beynəlxalq Bankının (ABB), eləcə də "AGBank", "RoyalBank", "Bank of Baku" və digər bankların müştərilərinin girov əmlakını da sığorta edir. Biz təkcə bununla kifayətlənmək istəmirik. Biz bilavasitə tərəfdaşlarımızla, ilk növbədə ABB ilə həm bizə, həm də banklara maraqlı olacaq yeni, birgə məhsulların yaradılması ilə bağlı danışıqlar aparırıq. Sirləri hələ ki açmaq istəmirəm, lakin həm bizim, həm də onlar üçün bu, yeni müştərilərin cəlb edilməsi imkanı deməkdir", - Novruzov bildirib.
Onun sözlərinə görə, ABB lizinq şirkətləri üçün yeni məhsulların yaradılmasını da öyrənir.
"Banklardan başqa, lizinq şirkətləri, xüsusən "Joint Leasing", "Qafqaz Leasing" ilə əməkdaşlıq edirik. Hələ ki yalnız şirkətlərin lizinqə verdikləri əmlakı sığortalayırıq. Lakin planlarımızda lizinq şirkətləri üçün yeni məhsulların yaradılması var. İndi hər iki tərəf üçün maraqlı ola biləcək effektiv istiqamətlərin müəyyənləşdirilməsi prosesi gedir", - Novruzov deyib.
Onun bildirdiyinə görə, şirkət VİP müştərilər üçün əlavə xidmətlər də təqdim edəcək.
"Hazırda biz kriteriyaları hazırlayırıq. Onların əsasında bu və ya digər müştərilər tərəfimizdən VİP sinfinə aid ediləcək. VİP müştərilərin siyahısı əsasında biz yalnız onlar üçün nəzərdə tutulan əlavə xidmətlər təqdim edəcəyik", - Novruzov qeyd edib.
Novruzovun dediyinə görə, şirkət yaxın iki ildə həyat sığortası ilə məşğul olmağı düşünmür.
"Təbii ki, Azərbaycanın sığorta bazarında aparıcı şirkətlərdən biri kimi həyat sığortası haqqında fikirləşməyə bilmərik. Planlarımızda bu var, lakin biz yaxın vaxtlarda sığortanın bu növü ilə məşğul olmağı düşünmürük. Bunun üçün ayrıca şirkət yaratmaq, təşkilati məsələləri həll etmək lazımdır. Üstəlik, indi Azərbaycanda bu sahədə mütəxəssis çox azdır. Yəni, iş çoxdur, buna görə də hələ ki gözləmə mövqeyindəyik", - şirkət nümayəndəsi vurğulayıb.
Novruzovun sözlərinə görə, bundan başqa, BSŞ İT-sistemin imkanlarını tətbiq etməklə yeni sığorta xidmətini həyata keçirməyi planlaşdırır.
"Yəqin xəbəriniz var, şirkətimiz Azərbaycanda ilk dəfə olaraq istehlakçılara ölkə xaricinə gedənlər üçün internet səhifəsi vasitəsilə sığorta polisləri almaq imkanını təqdim edib. Hazırda "Azəricard" prosessinq mərkəzi ilə fəaliyyətdə olan və potensial müştərilərimiz üçün sürpriz olacaq yeni xidmətin tətbiqi ilə bağlı danışıqlar aparırıq. Bu xidmətin tətbiqi üzrə işləri ilin sonunadək başa çatdırmağı planlaşdırırıq".
Azərbaycan Beynəlxalq Bankı tərəfindən yaradılan Beynəlxalq Sığorta Şirkəti 2002-ci il fevralın 2-də qeydiyyatdan keçib və 2002-ci il aprelin 1-dən etibarən lisenziyalaşdırılmış sığorta şirkəti qismində fəaliyyət göstərir. Şirkətin nizamnamə kapitalı 8,8 milyon manat təşkil edir.
Oktyabrın 26-na olan rəsmi məzənnə 0,801 AZN/USD təşkil edir.
