Azərbaycan, Bakı, 3 dekabr /Trend, müxbir N.İsmayılova/
Beynəlxalq Maliyyə Korporasiyası (BMK) Azərbaycanda tikinti məcəlləsinin qəbulunu tövsiyə edir. Bu barədə cümə günü Bakıda "Doing Business" hesabatının hazırlanması metodologiyası üzrə treninqdə hesabatın müəlliflərindən biri olan Svetlana Baqaudinova deyib.
"Tikintiyə icazənin verilməsi ilə bağlı vəziyyət bütün regionda çətindir, çünki SSRİ dağıldıqdan sonra qalan sistem dolaşıqdır. Məsələ ondadır ki, Azərbaycanda vahid tikinti məcəlləsi yoxdur", - Baqaudinova bildirib.
Onun sözlərinə görə, ölkənin bu indeks üzrə reytinqinin artırılması və sektorun inkişafı üçün tikintiyə icazələrin verilməsi, tikintidə risklərin idarə edilməsi əsasında diferensiallaşdırılmış normaların qəbulu, onlayn rejimdə qanun, norma və formalardan istifadənin təmin edilməsi və özəl müfəttişlər təsisatının yaradılması üzrə də "bir pəncərə"nin təsisi olunması lazımdır.
"ABŞ-da tikintiyə icazənin verilməsinin sütətləndirilməsi vergilər üzrə büdcəyə daxilolmaları iki faiz artırmağa imkan verdi", - o qeyd edib.
Onun fikrincə, bu proses kifayət qədər mürəkkəbdir və burada islahatların tezliklə aparılması qeyri-mümkündür. Sinqapur və Honq-Konqun təcrübəsini öyrənməklə BMK hesab edir ki, tikintiyə icazənin verilməsi sistemində islahatların aparılmasına 5-6 il lazımdır.
"Doing Business 2011" hesabatında Azərbaycanın "tikintiyə icazə" göstəricisi üzrə reytinqi 160 təşkil edib.
Noyabrda açıqlanan "Doing Business 2011: Sahibkarlıq üçün şəraitin yaxşılaşdırılması" hesabatında Azərbaycan sahibkarlıq fəaliyyəti üçün əlverişli şərait reytinqində 54-cü yeri tutub. Bu göstərici ötənilki hesabatda 38 olub. Araşdırmaya 183 ölkə cəlb olunmuşdu.
Son hesabata əsasən, 2009-2010-cu illərdə Azərbaycanda kreditlərin alınması və vergi ödənişləri sahələrində islahatlar effektiv aparılıb.
Hesabatda deyildiyi kimi, Azərbaycan maliyyə institutlarına borclar haqqında məlumat verib və kredit almağa imkan verən onlayn platforma - dövlət kredit reyestrini yaratmaqla kreditlərin alınması şəraitini yaxşılaşdırıb. Bundan başqa, Vergi Məcəlləsinə edilən dəyişikliklər bir sıra faiz dərəcələrinin, o cümlədən gəlir vergisi üzrə faiz dərəcələrinin azaldılmasına, eləcə də korporativ gəlir vergisi və ƏDV-nin ödəniş prosesinin sadələşdirilməsinə xidmət edib.
"Doing Business 2009" hesabatında Azərbaycan iqtisadiyyatda islahatlar sahəsində lider kimi tanınıb.