Azərbaycan, Bakı, 19 yanvar /Trend, müxbir N.İsmayılova/
Azərbaycan İqtisadi İnkişaf Nazirliyinin Sahibkarlığa Kömək Milli Fondu (SKMF) 2010-cu ildə 115 milyon manat məbləğində 1430 layihəni maliyyələşdirib. Bu barədə Fondun rəsmi mətbuatda dərc edilən balans sənədində deyilir.
SKMF-in güzəştli kreditləri hesabına bu layihələrin həyata keçirilməsi 5609 yeni iş yerinin yaradılmasına imkan verəcək.
2010-cu il ərzində SKMF sənaye istehsalı və emalın müxtəlif sahələrində 23,45 milyon manat məbləğində 94 müxtəlif layihəni maliyyələşdirib. Kənd təsərrüfatı məhsullarının emalı sahəsində 16 layihənin həyata keçirilməsinə 10,35 milyon manat, kənd təsərrüfatı mallarının istehsalı sahəsində 1303 layihəyə 55,65 milyon manat ayrılıb, turizm sahəsində 2,815 milyon manat məbləğində üç layihə maliyyələşdirilib, xidmətlər sahəsinin inkişafı üzrə 14 layihənin həyata keçirilməsinə isə 22,7 milyon manat xərclənib.
Fond 17,58 milyon manat məbləğində (verilən kredit portfelinin 15,3 faizi) 1362 kiçik kredit verib (kreditlərin ümumi sayının 95,2 faizi). Hesabat dövründə 10,05 milyon manat (0,9 faiz) məbləğində 8 kredit (0,6 faiz), 14,97 milyon manat (1,8 faiz) məbləğində (13 faiz) və 81,4 milyon manat məbləğində (70,8 faiz) 34 böyük kredit verilib.
2010-cu ildə Fondun maliyyələşdirmə üçün prioritet istiqamətləri kənd təsərrüfatı, yüngül və ərzaq sənayesinin inkişafı seçilib.
2009-cu ildə SKMF səlahiyyətli kredit təşkilatları vasitəsilə 130 milyon manat məbləğində 2100-dən çox kredit verib. Beləliklə, 2009-cu ildə 2008-ci illə müqayisədə SKMF-in vəsaitləri hesabına güzəştli kreditlər alan sahibkarların sayı 2,6 dəfə, kreditlərin həcmi isə 48 faiz artıb.
SKMF 1992-ci ildə yaradılıb. Sahibkarlara kreditlərin verilməsi səlahiyyətli banklar və bank olmayan kredit təşkilatları vasitəsilə həyata keçirilir. Onların ümumi sayı 36-dır.
