Azərbaycan, Bakı, 25 yanvar /Trend, müxbir N.İsmayılova/
Azərbaycan Mərkəzi Bankı (AMB) nağdsız əməliyyatlara keçidə marağın artırılması məqsədilə biznes-strukturlarla dialoqu fəallaşdırmağa ehtiyac görür. Bu barədə dünən AMB İdarə Heyətinin sədri Elman Rüstəmov AzTV televiziyasına müsahibəsində bildirib.
"Ölkədə nağdsız əməliyyatların stimullaşdırılması məqsədilə Vergilər Nazirliyi ilə birgə işçi qrup yaradılıb. Onların iqtisadi stimullaşdırılması üçün keçirilən tədbirlər öyrənilir. İlk növbədə, bu, biznes-strukturlarla bu sistemdən onların gözləntilərini öyrənməyə və maraqlarını artırmağa kömək edən fəal dialoqdur, ikincisi, bu istiqamətdə xərclərin, eləcə də tariflərin, bankomatlar və POS-terminallar vasitəsilə aparılan əməliyyatların dəyərinin azaldılmasıdır", - Rüstəmov bildirib.
Onun sözlərinə görə, hamının qanunvericiliyin tələblərinin pozulmasına görə məsuliyyət daşıdığını anlaması üçün inzibati tədbirlərdən də istifadə etmək vacibdir. Rüstəmov bildirib ki, ölkədə nağdsız əməliyyatların inkişafı ciddi məsələdir və AMB-nin əsas vəzifələrindən biridir.
"Ödənişlərin bank sistemi vasitəsilə aparılması ölkədə iqtisadi inkişafın əlamətidir. Məqsəd ondadır ki, bank sektoru vasitəsilə nə qədər çox ödənişlər aparılarsa, sektor daxilində bir o qədər çox vəsait qalar və onlardan təkcə ödəniş əməliyyatlarının keçirilməsi üçün deyil, həm də kreditləşmə və yığım məqsədilə istifadə oluna bilər. Bu, kapital qoyuluşlarının və investisiyaların artırılması deməkdir. Ölkə iqtisadiyyatı güclənir və onun maliyyə potensialı genişlənir", - o, deyib.
Rüstəmovun sözlərinə görə, bu gün AMB inkişaf etmiş ölkələrin qabaqcıl təcrübəsini öyrənərək milli elektron ödəniş infrastrukturu yaradıb. O beynəlxalq standartlara tam cavab verir və bu gün ondan artıq ölkənin mütəxəssisləri bu sistemlə tanış olmaq məqsədilə Azərbaycana gəlirlər.
"Son beş il ərzində bankların buraxdıqları ödəniş kartlarının sayı 1,7 dəfə artıb və 4 milyon ədədə çatıb. POS-terminalların sayı 3,8 dəfə artaraq 8 min ədədə çatıb, bankomatların sayı isə təxminən iki dəfə artaraq 1900 ədədi ötüb", - Mərkəzi Bankın rəhbəri bildirib.
