Azərbaycan, Bakı, 25 yanvar /Trend, müxbir Ü.İsmayılova/
Azərbaycan Turizm Assosiasiyası ölkənin daxili və xarici bazarında respublikanın turizm potensialının təbliğatının aparılmasını 2011-ci ildə fəaliyyətinin prioritet istiqaməti hesab edir.
"Turizm potensialının fəal təbliği xüsusilə dövlət başçısının 2011-ci ili "Turizm ili" elan etməsi çərçivəsində aparılacaq", - Trend-in məlumatına görə, çərşənbə axşamı assosiasiya rəhbəri Nahid Bağırov deyib.
Onun sözlərinə görə, assosiasiya fəaliyyət planı hazırlayıb, bu plana əsasən ilk növbədə yerli əhali, gələcəkdə isə Azərbaycan ilə turizm sahəsində əməkdaşlıqda maraqlı olan xarici ölkə nümayəndələri üçün informasiya turları təşkil olunacaq.
Ölkə daxilində infoturlarla bağlı Bağırov deyib ki, bir regionun nümayəndələri üçün digər regionlarda turlar keçiriləcək. Turların əsas məqsədi gələcəkdə xaricdən gələn turistlərə ölkənin tarixi və mədəniyyətinin təbliği üçün əhalinin məlumatlılığının artırılmasıdır.
"Belə hesab edirik ki, infoturların keçirilməsi ölkəyə turist axınının artımı üçün əlavə təkan olacaq", - Bağırov deyib.
Onun sözlərinə görə, turist axınının artması üçün vacib amillərdən biri də müxtəlif ölkələrə çarter reyslərinin açılmasıdır. 2011-ci ildə assosiasiya bu istiqamətdə işləri gücləndirmək niyyətindədir.
"Təəssüflər olsun ki, Azərbaycan dövlət aviaşirkətinin aviasiya parkı elə də zəngin deyil və buna görə də çarter reysləri açmaq istədiyimiz ölkələrin aviaşirkətlərinə müraciət etməli oluruq", - Bağırov deyib.
Onun sözlərinə görə, birbaşa hava nəqliyyatı hesabına Azərbaycana turist axını iki və yaxud üç dəfə arta bilər.
Bağırovun sözlərinə görə, 2011-ci ildə assosiasiya əsasən Azərbaycana turistlərin gəldiyi ölkələrdə nümayəndəliklərini açmağı planlaşdırır.
"Ölkə xaricində Azərbaycan Turizm Assosiasiyasının nümayəndələri Azərbaycana turpaket satışının artımı üçün onun koordinatorları olacaq əcnəbi şirkətlər yaradılacaq", - Bağırov deyib.
Onun fikrincə, Azərbaycanda turizmin fəal inkişafı üçün tədbirlərin həyata keçirilməsi hesabına ölkəyə turist axını 2011-ci ildə 20 faiz artırılacaq.
