Azərbaycan, Bakı, 9 fevral/Trend, müxbir N.İsmayılova/
Yanvarda Azərbaycan Mərkəzi Bankı yanında Maliyyə Monitorinqi Xidmətinə şübhəli əməliyyatlar üzrə 2006 və cari əməliyyatlar üzrə 13375 məlumat daxil olub. Bu barədə çərşənbə günü xidmətin məlumatında deyilir. Yanvarda xidmətə ümumilikdə 15381 sayda məlumat daxil olub.
2010-cu ilin yanvarı ərzində şübhəli əməliyyatlar üzrə cəmi 5, cari əməliyyatlar üzrə 343, 2009-cu ilin yekunları üzrə müvafiq olaraq 3 və 231 məlumat daxil olub.
Beləliklə, daxil olan məlumatların ümumi həcminin 13 faizini şübhəli əməliyyatlar üzrə, 87 faizini isə cari əməliyyatlar üzrə məlumatlar təşkil edir.
Monitorinq xidməti kredit, sığorta və təkrar sığorta təşkilatları, qiymətli kağızlar bazarı və kredit təşkilatlarının peşəkar iştirakçıları, kredit təşkilatlarının lizinq xidmətləri, poçt şöbələri və digər təşkilatlar vasitəsilə pul köçürmələri, lombardlar, sərmayə fondları, qiymətli metal və daşlarla bağlı sövdələşmələr və onlardan düzəldilmiş məmulatlar, qeyri-hökumət və dini təşkilatlar, lotereya təşkilatçıları, daşınmaz əmlak alqı-satqısı xidməti göstərən şəxslər (rieltorlar), vəkillər, auditorlar, daşınmaz əmlakla bağlı sövdələşmələr, müştəri vəsaitləri, qiymətli kağızlar və əmlak, müştəri bank və depo hesabların fəaliyyətini əhatə edir.
Azərbaycan Mərkəzi Bankı yanında Maliyyə Monitorinqi Xidməti Prezident İlham Əliyevin 2009-cu il 23 fevral tarixli fərmanına uyğun yaradılıb.