Azərbaycan, Bakı, 10 fevral / Trend, müxbir İ.Xəlilova/
İslam İnkişaf Bankı (İİB) ümumi dəyəri 102,8 milyon dollar olan yeni kənd təsərrüfatı layihəsinin maliyyələşdirilməsinə 65,6 milyon dollar həcmində kreditin ayrılması haqda kredit sazişi layihəsinin ilkin variantını Azərbaycan hökumətinə göndərib. Bu barədə cümə axşamı bankın Bakı ofisindən bildirilib.
Bu layihə 19,7 milyon dollar ayırmağı planlaşdıran Beynəlxalq Kənd Təsərrüfatı İnkişafı Fondu (IFAD) ilə birgə, yerdə qalan hissə isə ölkə hökumətinin iştirak payı hesabına maliyyələşdiriləcək. Buna baxmayaraq, kredit sazişi hər bir beynəlxalq maliyyə institutu tərəfindən ayrıca təqdim olunacaq.
Ölkə hökumətindən deyildiyi kimi, IFAD hələ bu layihəni təsdiqlənmək üçün Direktorlar Şurasına təqdim etməyib.
İİB krediti üç hissədən ibarətdir, onlardan ikisi güzəştli şərtlərlədir: 14,9 milyon dollar illik 2,65 faizlə beş illik güzəşt dövrü olmaqla 20 illiyə verilir, iki milyon dollar bank xidmətlərinin ödənilməsindən 7 il azad edilməklə (ödəmə hələ müəyyən edilməyib) 25 il müddətinə, 48,7 milyon dollar istisna metodu ilə, yəni swap+1,2 faiz dərəcəsilə 3 il güzəşt dövrü olmaqla 15 illiyə verilir.
Layihənin əhatə zonası Yevlax, Ağdaş, Şəki və Oğuzdur.
Bu layihə İİB ilə 2012-ci ilədək nəzərdə tutulan üçillik əməkdaşlıq proqramına daxil edilib. Azərbaycan hökuməti İİB-dən maliyyələşdirməni almaqla artıq növbəti mərhələyə - kredit müqaviləsinin imzalanmasına keçir, IFAD-la bağlı isə Direktorlar Şurasında kreditin təsdiqlənməsi hələ gözlənilir.
IFAD-ın Azərbaycanda reallaşdırdığı kənd təsərürfatı layihələri ilə oxşar olan bu layihəyə mikrokreditlərin verilməsi, su istifadəçiləri assosiasiyasının yaradılması, kanalizasiya sisteminin yaxşılaşdırılması, fermerlərin texnika, yemlə təmin edilməsi də daxil edilə bilər. Kredit komponenti IFAD kreditinə daxil ediləcək.
1997-ci ildən başlayaraq, IFAD Azərbaycanda kənd təsərrüfatının inkişafı sahəsində bir sıra proqramlar həyata keçirib. Azərbaycanla əməkdaşlığın əvvəlindən Azərbaycan IFAD xətti ilə 20 il ödənişdən azad edilməklə və illik 0,75 faizlə güzəştli maliyyələşdirmə alıb.
İndiyədək ölkə IFAD-dan ümumi məbləği 49,3 milyon dollar olan dörd kredit alıb. Fond artıq 2010-2015-ci illərdə yeni layihələri həyata keçirməyə hazır olduğunu təsdiqləyib.
Azərbaycan 1992-ci ildən İİB-in üzvüdür və bu gün İİB-in ölkədə iqtisadiyyatın müxtəlif sahələrində layihələrin həyata keçirilməsi üçün ayrılan portfeli 480 milyon dollara çatır.