Azərbaycan, Bakı, 22 fevral /Trend, müxbir A.Axundov/
Fevralın 23-də Buxarestdə Azərbaycan-Rumıniya biznes forumu keçiriləcək. Trend-in məlumatına görə, bu barədə çərşənbə axşamı Türkiyənin "Zaman" qəzetinin rumın bürosu məlumat yayıb.
Azərbaycanlı sahibkarlardan ibarət 15 nəfərlik qrup fevralın 21-də investisiya və birgə əməkdaşlıq məsələlərini müzakirə etmək üçün Rumıniyaya gəliblər. Fevralın 22-də Azərbaycandan olan biznesmenlər Türkiyə Sahibkarlar İttifaqının (TİAD) yerli mərkəzinə baş çəkəcəklər. Səfər fevralın 25-dək davam edəcək.
Biznes forumu Rumıniya-Azərbaycan Sənaye-Ticarət Palatası tərəfindən təşkil olunub.
Azərbaycan Dövlət Statistika Komitəsinin məlumatına görə, 2010-cu ildə ölkənin Rumıniya ilə mal dövriyyəsi 117,189 milyon dollar təşkil edib. Bu zaman ixrac əməliyyatları 94,249 milyon dollar, idxal əməliyyatları isə 22,94 milyon dollar həcmində həyata keçirilib.