Azərbaycan, Bakı, 2 mart /Trend, müxbir N.İsmayılova/
Xəzər Beynəlxalq İnvestisiya Şirkəti (CIIC) yatırılan investisiyaların uğulu olduğunu təsdiq edən ilkin nəticələr əldə edildikdən sonra əlavə investorlarla danışıqlara başmağı planlaşdırır. Bu barədə çərşənbə günü Trend-ə şirkətin icraçı direktoru Toğrul Köçərli deyib.
"Bu il şirkətin kapitalını artırmağı planlaşdırmırıq, lakin ola bilsin ki, gələn il əlavə investorlarla danışıqlara başlayaq. Lakin konkret qərar hələ ki yoxdur", - o qeyd edib.
Onun sözlərinə görə, şirkətin nizamnamə kapitalı 31 milyon manat, həyata keçirilən üç layihə üzrə investisiya portfeli isə 16 milyon dollar təşkil edir.
"Bazara bu yaxınlarda çıxmağımız və artıq il yarımdır ki, fəal işləməyimiz səbəbindən qoyduğumuz bütün investisiyalar indi nəticələr verməkdədir. Buna görə də biz əvvəlcə bu layihələr üzrə maliyyə nəticələri əldə etmək və yalnız bundan sonra investorlarla danışıqlara başlamaq istəyirik", - o qeyd edib.
Onun sözlərinə görə, hazırda baxılmaq üçün şirkətə çoxlu layihə daxil olur, lakin onların hansı birinin həyata keçirilələcəyini demək hələ ki çətindir.
Azərbaycanın İnvestisiya Şirkəti (AİŞ) və Özəl Sektorun İnkişafı üzrə İslam Korporasiyası (ICD) tərəfindən təsis edilən Xəzər Beynəlxalq İnvestisiya Şirkəti 2008-ci ilin mayında 2,954 milyon manatlıq ilkin kapitalla qapalı səhmdar cəmiyyət kimi qeydiyyatdan keçib. AİŞ-in iştirak payı 25 faiz, ICD-nin isə 75 faiz təşkil edib. Hazırda şirkətin səhmdarlarının siyahısı genişlənib. Strukturun xarici investorlarına Küveyt İnvestisiya Şirkəti "Hares Group", "AL Ahmar Gropu" Yəmən İnvestisiya Şirkəti, "MAM Group" Sudan şirkəti, Dubayın "TANMIYAT Group" şirkəti, eləcə də İslam İnkişaf Bankı aiddir. Xarici səhmdarların CIIC-nin kapitalında iştirak payı 23 milyon manatı ötür.
Strategiyaya əsasən, CIIC-nin investisiyaları şəriət qaydalarına zidd olan spirtli içkilər və donuz əti məhsullarının istehsalı üzrə müəssisələr istisna olmaqla, iqtisadiyyatın real sektoruna, həmçinin, maliyyələşdirmə və sığorta xidmətlərinin göstərilməsində standart şərtlərlə fəaliyyət göstərən bank və sığorta təşkilatlarına qoyulacaq.
Martın 2-nə olan rəsmi məzənnə 0,7939 AZN/USD təşkil edir.