Azərbaycan, Bakı, 9 mart /Trend, müxbir E.İsmayılov/
Azərbaycandan Rusiya istiqamətində qatarların daimi hərəkət qrafikinin hazırlanması üzrə iş aparılır. Trend-in məlumatına görə, bu barədə çərşənbə günü "Azərbaycan Dəmir Yolları" QSC-nin mətbuat xidmətinin rəhbəri Nadir Əzməmmədov deyib.
Onun sözlərinə görə, hazırda qatarların martın 26-dək istifadə olunacaq müvəqqəti qrafiki qüvvədədir, bundan sonra yük və sərnişin qatarlarının daimi hərəkət qrafikinin tətbiqi planlaşdırılır.
"Ayın 26-dək qatarların müvəqqəti hərəkət qrafiki qüvvədə olacaq. Bundan sonra yeni daimi qrafik tətbiq ediləcək", - Əzməmədov qeyd edib.
Qatarların müvəqqəti hərəkət qrafiki fevralın 13-də tətbiq edilib. Bu, "Rusiya Dəmir Yolları"nın fevralın 4-dən təhlükəsizliyin təmin edilməsi məqsədilə Samur-Artezian (Şimali Qafqaz Dəmir Yolları) məntəqəsi üzrə sərnişin və yük qatarlarının hərəkətinin dayandırılması haqqının qərarı ilə əlaqədar olub.
Belə tədbirlərin görülməsi son vaxtlar Dağıstan ərazisində baş verən partlayışlarla bağlıdır.