Azərbaycan, Bakı, 15 mart /Trend, müxbir Ü.İsmayılova/
Yanvar-fevral ayı ərzində Azərbaycanda tikinti işlərinin həcmi 2010-cu ilin analoji dövrü ilə müqayisədə 7,1 faiz artıb. Bu barədə çərşənbə axşamı Azərbaycan Dövlət Statistika Komitəsindən Trend-ə verilən məlumatda deyilir.
"Tikinti işlərinin ümumi həcminin 68,1 faizi yeni tikinti, yenidənqurma və genişləndirmə, 20,2 faizi əsaslı təmir, 5 faizi cari təmir, 6,7 faizi isə digər tikinti işlərinin payına düşür", - məlumatda deyilir.
Dövlət və özəl şirkətlər tərəfindən həyata keçirilən tikinti işlərinin həcmi ümumi işin müvafiq olaraq 35,8 və 64,2 faizini təşkil edib.
Yanvarda tikinti sektorunda işləyən 64,6 min şəxsin orta aylıq nominal əməkhaqqısı 509,8 manat təşkil edib. Bu, 2010-cu ildəkindən 9,1 faiz çoxdur. Böyük və orta tikinti şirkətlərində əməkhaqqının nominal səviyyəsi 535,6 manat təşkil edib.
Yaşayış binalarının tikintisi sahəsində əməkhaqqı ötən ilin anoloji dövrünə nisbətdə 10,4 faiz artaraq 537,3 manata, mülki təyinatlı tikinti işləri üzrə 23,7 faiz artaraq 335,3 manata, xüsusiləşdirilmiş tikinti işləri üzrə 3,2 faiz artaraq 601,8 manata çatıb.
Martın 15-nə olan məzənnə 0,7933 AZN/USD təşkil edir.
