Azərbaycan, Bakı, 7 aprel /Trend, müxbir N.İsmayılova/
İordaniya Haşimilər Krallığının sənaye və ticarət naziri Hani əl-Mülkinin apreldə Bakıya gözlənilən səfəri çərçivəsində iqtisadiyyatın müxtəlif sahələrini əhatə edən bir sira sənədlərin imzalanmasının müzakirəsi planlaşdırılır.
"Sənədlər energetika və mineral resurslar, investisiyalar, kənd təsərrüfatı, baytarlıq, karantin və bitkilərin müdafiəsi sahələrini, eləcə də gömrük işlərində qarşılıqlı yardım məsələlərini əhatə edəcək. Azərbaycanla İordaniya arasında imzalanan sertifikatların qarşılıqlı tanınması sahəsində əməkdaşlıq haqqında sazişin aktivləşdirilməsinə də baxılacaq. Bütün bu sənədlər müzakirə mərhələsindədir", - Hani əl-Mülki cümə axşamı Trend-ə müsahibəsində bildirib.
Səfər çərçivəsində Azərbaycan bazarına İordaniyadan ədviyyat, geyim, mühəndis və kimya sənayesi malları, kənd təsərrüfatında istifadə olunan zəhərli kimyəvi preparatlar kimi malların ixracının inkişafı və şaxələndirilməsi yollarının müzakirəsi də planlaşdırılır.
"Biz İordaniyada Azərbaycanın investisiya imkanlarının müəyyən edilməsi məsələsini müzakirə etməyi və kənd təsərrüfatı daxil da olmaqla, sənaye, turizm və s. kimi prioritet sahələr haqqında fikir mübadiləsi aparmağı planlaşdırırıq. Həmçinin investisiya layihələri haqqında ətraflı məlumatların mübadiləsi, bu sahəyə aid olan investisiya qanunları və normativ aktların müzakirəsi və hər iki ölkənin özəl sektorlarının məlumatlandırılması üzrə informasiya mübadiləsi aparılacaq", - Hani əl-Mülki bildirib.
Onun sözlərinə görə, ölkələr arasında mal tədarükü ilə məşğul olacaq birgə nəqliyyat şirkətinin yaradılması imkanları da müzakirə olunacaq.
Hani əl-Mülkinin rəhbərliyi ilə İordaniya nümayəndə heyəti apreldə Bakıya gələcək. Səfərin məqsədi aprelin 11-12-də iqtisadi əməkdaşlıq üzrə Azərbaycan-İordaniya hökumətlərarası komissiyasının ikinci iclasında iştirak etməkdir.
Məqalənni hazırlanmasında A.Tağıyeva iştirak edib.
