Azərbaycan, Bakı, 25 aprel /Trend, müxbir İ.Xəlilova/
Almaniya İnkişaf Bankı KfW Azərbaycan bankı "Turanbank"ın Azərbaycanda kənd yerlərinin aqromaliyyələşdirilməsi layihəsi çərçivəsində üçüncü kreditin verilməsi üçün namizədliyinə baxır. Bu barədə bazar ertəsi Trend-ə KfW-nin Bakı ofisindən deyiblər.
"Turanbank"da artıq qiymətləndirmə aparılıb və hazırda bank kənd yerlərində iş təcrübəsinin olması ilə əlaqədar KfW-nin 1,5 milyon avro məbləğində kreditini almağa potensial iddiaçıdır", - KfW-dən bildiriblər.
Bu layihə çərçivəsində krediti almağa iddiaçıların seçilməsi üzrə tələblər arasında ölkə regionlarında inkişaf etmiş filial şəbəkəsini, hazırlıq keçmiş personalı və s. qeyd etmək olar.
"Bu yaxınlarda KfW-nin maliyyə layihələri üzrə meneceri Herald Hiqnerin ölkəyə səfəri zamanı bu bankda görüşü olub", - alman bankının ofisindən bildiriblər, lakin "Turanbank" ilə müqavilənin imzalanması müddətini deməkdə çətinlik çəkiblər.
Layihənin birinci fazasının dəyəri 5 milyon avro təşkil edir. İlkin mərhələdə Şəki-Zaqatala və Qaxın kənd yerləri əhatə olunacaq. Kredit resursları indiyədək iki kredit təşkilatı - "Bank Respublika" və bank olmayan kredit təşkilatı "CredAgro" arasında bölüşdürülüb. "Bank Respublika" 1,5 milyon avro, "CredAgro" 2 milyon avro alıb, qalan vəsaitlər isə daha bir bank üçün nəzərdə tutulmuşdu.
Hazırda KfW Azərbaycanda kənd yerlərinin aqromaliyyələşdirilməsi layihəsinin davam etdirilməsi imkanlarını da nəzərdən keçirir. Bank ikinci fazanın maliyyələşdirilməsinə 3 milyon avro ayırmağı planlaşdırır.
KfW-nin Bakı ofisində layihənin ikinci fazasının artıq bu il həyata keçirilməsinə başlanacağının mümkünlüyünü istisna etmirlər.
Bu vəsaitlər birinci faza çərçivəsində olduğu kimi, subordinasiya olunmuş kreditlər qismində veriləcək. Belə borclar ikinci səviyyənin kapitalına əlavə edilsə də, vəsaitlər regionlarda kənd əhalisinin kreditləşdirilməsi üçün nəzərdə tutulacaq.
Kreditlərin şərtləri bankların Almaniya-Azərbaycan Fondu vasitəsilə maliyyələşdirilməsi şərtlərinə oxşar olub.
İlk müqavilə banklardan fərqli olaraq yalnız aqromaliyyələşdirmədə ixtisaslaşan bank olmayan kredit təşkilatı "CredAgro" ilə imzalanıb. "CredAgro" 2000-ci ildə ACDI-VOCA beynəlxalq humanitar təşkilatı tərəfindən təsis edilib.
Bu gün "CredAgro"nun fəaliyyəti regionlarda layihələrin maliyyələşdirilməsinə yönəlib və 27 rayonu əhatə edir. Bununla əlaqədar bank 9 nümayəndəlik yaradıb və yardımçı ofislərə malikdir. Onun kredit ayırdığı sahələr müxtəlifdir - kənd təsərrüfatı kreditləşməsi, ticarət əməliyyatları, infrastruktur, lizinqin maliyyələşdirilməsi, istehlak kreditləşməsi. İpotekadan başqa, bunlar demək olar ki, bütün istiqamətlərdir.
"Bank Respublika" 1992-ci ilin mayından fəaliyyətə başlayıb. Bank üçün ən vacib prioritetlərdən biri fəaliyyət coğrafiyasının və müştərilərə xidmət şəbəkəsinin genişləndirilməsidir. Hazırda bankın 34 filial və şöbəsi var.
Bankın səhmdarları sırasına Almaniyanın iki böyük təşkilatı - "KfW" bank qrupuna daxil olan DEG və bankın 25 faiz+1 səhmlər paketi ilə "Sparkassen-Finanzgruppe"nin üzvü SIDT daxildir.
"Turanbank "1992 -ci ildə yaradılıb. Bankın 25 səhmdarı var. Bunun 5-i hüquqi şəxs (21,8 faiz), 20-si fiziki şəxsdir (78,2 faiz).
