Azərbaycan, Bakı, 2 may /Trend, müxbir N.İsmayılova/
Asiya İnkişaf Bankının (AİB) prezidenti Haruhiko Kuroda və OPEC-in Beynəlxalq İnkişaf üzrə Fonunun (OFID) baş direktoru Süleyman əl-Herbiş bazar ertəsi iki təşkilat arasında mövcud əməkdaşlığı genişləndirəcək anlaşma memorandumunu imzalayıblar. Trend-in məlumatına görə, bu barədə AİB-in bazar ertəsi yaydığı məlumatda deyilir.
Memorandum mayın 3-dən 6-dək Hanoyda (Vyetnam) keçiriləcək AİB-in Direktorlar Şurasının illik 44-cü iclası ərəfəsində imzalanıb.
"AİB-in OFID ilə əməkdaşlığı bizim ümumi tərəfdaş ölkələrimizdə və müəyyən etdiyimiz prioritet sektorlarda fəaliyyətin koordinasiyası sahəsində effektivliyi artırmağa imkan verəcək", - Kuroda bildirib.
Memorandum çərçivəsində AİB və OFID layihələrin birgə maliyyələşdirilməsi məqsədilə sıx əməkdaşlıq edəcəklər. İki institut bir-birinin fəaliyyətinin effektiv dəstəklənməsi və ümumi maraq doğuran, o cümlədən iqtisadi artımın dəstəklənməsi və həyat keyfiyyətinin yaxşılaşdırılması məsələlərinin müzakirəsi ilə bağlı məsləhətləşmələrin aparılması üzrə məlumat mübadiləsi aparacaqlar.
"Bu saziş bizim institusional əməkdaşlığımızın mövcud çərçivələrini möhkəmlədir, bu isə OFID və AİB-in tərəfdaş ölkələrinə və Asiya regional təşşəbüslərinə müsbət təsir göstərəcək", - əl-Herbiş bildirib.
Hazırda iki təsisat birlikdə Azərbaycan, Əfqanıstan, Banqladeş, Kamboca, Hindistan, Qırğızıstan, Laos, Maldiv adaları, Nepal, Pakistan, Papua-Yeni Qvineya, Filippin, Samoa, Solomon adaları, Şri-Lanka, Tacikistan, Tayland və Özbəkistanda 765 milyon manat məbləğində 90 layihəni həyata keçiriblər.
Azərbaycan Asiya Bankının üzvlüyünə 22 dekabr 1999-cu ildə qəbul edilib. Ölkənin bankın kapitalında iştirak payı 0,5 faizdir.
AİB-in aparıcı səhmdarları: Yaponiya və ABŞ (ümumi səhmdar kapitalının 31,2 faizi), Hindistan və Çin (12,8 faiz), Avstraliya, Cənubi Koreya və Kanada (16 faiz) və s.
AİB 1966-cı ildə təsis edilib və 67 üzvü var. Bankın mənzil-qərargahı Filippinin paytaxtı Manilada yerləşir.