Azərbaycan, Bakı, 14 may /Trend, müxbir A.Axundov/
Ötən ilin analoji dövrü ilə müqayisədə 2011-ci ilin yanvar-aprelində Azərbaycanda kənd təsərrüfatı məhsullarının istehsalı 5,2 faiz, o cümlədən bitkiçilik 10,5 faiz, heyvandarlıq 5 faiz artıb. Bu barədə Azərbaycan Dövlət Statistika Komitəsindən məlumat verilib.
Məlumata əsasən, apreldə ölkədə yaz tarla işləri davam edib və mayın 1-nə 260,7 min hektar sahədə yazlıq bitkilərin səpini aparılıb. Ötən illə müqayisədə əkin sahəsi 12,3 faiz artıb.
53,3 min hektar sahədə kartof, 48,6 min hektarda tərəvəz, 30,2 min hektarda çoxillik otlar, eləcə də taxıl, qarğıdalı, pambıq, bostan bitkiləri, günəbaxan, şəkər çuğunduru və s. əkilib. Təsərrüfatlarda 70 ton kartof və 31,9 min ton tərəvəz becərilib.
2011-ci ilin ilk dörd ayı ərzində heyvandarlıq sahəsində iribuynuzlu mal-qaranın sayı il ərzində 1,2 faiz artaraq 2,65 milyona, qoyun və keçilərin sayı isə 0,5 faiz artaraq 8,64 milyona çatıb.
Hesabat dövrü ərzində 133 min ton ət, 497,8 min ton süd, 343,7 milyon ədəd toyuq yumurtası istehsal edilib.
2010-cu ilin ilk dörd ayı ilə müqayisədə ət istehsalı cari ilin yanvar- aprelində 5,7 faiz, süd 8,1 faiz, toyuq yumurtası istehsalı 14 faiz artıb.
