Azərbaycan, Bakı, 16 may /Trend, müxbir N.İsmayılova/
Yanvar-apreldə Azərbaycanda sənaye istehsalı (məhsul istehsalı və sənaye xarakterli xidmətlərin göstərilməsi) 9,8 milyard manat təşkil edib ki, bu da 2010-cu ilin analoji dövr göstəricisindən 0,9 faiz azdır. Bu barədə bazar ertəsi Dövlət Statistika Komitəsindən bildirilib.
Yanvar-apreldə özəl sektorun payı ötən ilin analoji dövrünə nisbətən sənaye istehsalının ümumi həcminin 79 faizini təşkil edib. Bu zaman 91,5 faiz sənaye məhsulları istehsalının, 8,5 faiz sənaye xarakterli xidmətlərin payına düşüb. Sənayenin qeyri-neft sektorunda məhsul istehsalı 10,7 faiz artıb.
Hesabat dövrü ərzində hasilat sənayesində istehsalın həcmi 2,9 faiz azalaraq 7,4 milyard manat təşkil etməklə bütün sənaye istehsalının xüsusi çəkisinin 75,4 faizi həcmində olub. Hesabat dövründə neftin həcmi 15,9 milyon ton, təbii qaz hasilatı isə 8,4 milyard kubmetr həcmində olub.
Emal sənayesində istehsalın həcmi 5,3 faiz artaraq 1,8 milyard manat təşkil edib. Yanvar-apreldə ölkədə avtomobillərin, qoşqu və yarımqoşquların (1,62 dəfə), elektrik avadanlıqlarının istehsalında (2 dəfə), metallurgiya (1,8 dəfə) və kimya sənayesində (36,8 faiz) əhəmiyyətli dərəcədə artım müşahidə olunub.
Ərzaq məhsullarının istehsalında da 8,4 faizlik əhəmiyyətli artım müşahidə olunub. Ölkədə kolbasa məhsullarının istehsalı 3,4 faiz artaraq 631,6 ton, ət 4,6 faiz (84,8 min ton), süd 5,4 faiz (233,1 min ton), kərə yağı 0,7 faiz (6,9 min ton), pendir və kəsmik 2,2 faiz (14,6 min ton), şəkər 26,2 faiz (107,4 min ton) təşkil edib.
Mayın 16-na olan rəsmi məzənnə 0,7907 AZN/USD təşkil edir.
