Azərbaycan, Bakı, 20 may /Trend, müxbir N.İsmayılova/
Azərbaycan Mərkəzi Bankına (AMB) saxlanması üçün "R.V.Investment Group Services" şirkəti ilə Gədəbəy yatağı üzrə saziş çərçivəsində 113,6 kiloqram və ya 3652,7 unsiya, əyarı 999,9 olan növbəti qızıl partiyası verilib. Trend-in məlumatına görə, bu barədə cümə günü Maliyyə Nazirliyinin məlumatında deyilir.
Bunun nəticəsində AMB-də saxlanılan qızılın ümumi həcmi 389,2 kiloqrama (12514,7 unsiya) çatıb. Bu gün həmin həcmdə qızılın bazar qiyməti 18,7 milyon dollar təşkil edir.
"Anglo Asian Mining plc" 1997-ci ilin avqustunda Azərbaycan hökuməti ilə imzalanan PSA tipli (hasilatın pay bölgüsü) saziş əsasında Azərbaycanın cənub-qərbində yerləşən altı - Gədəbəy, Ordubad, Qoşa Bulaq, Qızıl Bulaq, Vejnəli və Söyüdlü yataqlarının işlənməsi hüququna malikdir.
Azərbaycanda yeganə qızıl istehsalçısı şirkəti olan "Anglo-Asian Mining plc" 2011-ci ilin birinci rübündə Gədəbəy qızıl mədənindən 14 028 unsiya qızıl hasil edib.
Yataqlardan hasil olunan qızıl təmizlənməsi üçün İsveçrəyə göndərilir. Külçələr Azərbaycana gətirilir və hökumətin hesabına mühafizə edilir.
Müqaviləyə görə, yataqlardan 400 tona yaxın qızıl, 2500 ton gümüş və 1,5 milyon ton mis hasil edilməsi planlaşdırılır.
İlk qızıl və gümüş 2009-cu ilin mayında Gədəbəy yatağından hasil edilib. Ümumilikdə 2015-ci ilədək Gədəbəy yatağından 300 min unsiya qızılın hasil edilməsi planlaşdırılır.