Azərbaycan, Bakı, 3 iyun /Trend, müxbir N.İsmayılova/
2013-cü ilədək Azərbaycanın Vergilər Nazirliyi ölkədəki vergi terminallarının sayını 55-ə çatdırmağı planlaşdırır. Bu barədə cümə günü jurnalistlərə vergilər nazirinin müavini Sahib Ələkbərov məlumat verib.
"Məqsədimiz vergi idarələrinin fəaliyyət göstərmədiyi bütün şəhərlərdə və rayon mərkəzlərində vergi terminallarını istismara verməkdir", - Ələkbərov deyib.
Onun sözlərinə görə, bu gün ölkədə 27 vergi terminalı fəaliyyət göstərir.
İlin əvvəlindən on terminal tikilib və istismara verilib. Onun sözlərinə görə, nazirlik həmin terminallarda göstərilən xidmət spektrinin genişlənməsi üzrə də işlər həyata keçirir.
Yaxın vaxtlarda terminallarda nazirliklə birbaşa əlaqəni təmin etmək məqsədilə "video müraciət" xidmətinin tətbiqi də planlaşdırılır.
Bu terminallar vasitəsilə vergiödəyicilər vergi orqanları ilə elektron sənəd dövriyyəsi həyata keçirə biləcək, bəyannamələri və başqa hesabat sənədlərini sonradan yola sala bilməklə düzgün tərtib edə biləcək, bununla əlaqədar lazımi izahatı ala biləcəklər. Terminallarda habelə vergiödəyicilərin şəxsi vərəqələrinə baxmaq üçün imkan da yaradılacaq.
