Azərbaycan, Bakı, 24 iyun /Trend, müxbir A.Axundov/
Mayda Bakının avtomobil bazarında təklif 1,8 faiz azalıb. Trend-in məlumatına görə, bu barədə "Əmlak Bazarı İştirakçıları" İctimai Birliyinin məlumatında deyilir.
Məlumata əsasən, ay ərzində dinamikanın nisbi artımına baxmayaraq, təklifin tələbi üstələməsi tendensiyası hələ də davam etməkdədir.
Ay ərzində bağlanan əqdlərin dinamikası artsa da, qiymətlərdə ciddi dəyişiklik baş verməyib. May ayı üçün bazarda orta qiymət əvvəlki ay ilə eyni olub və 15 115 dollar təşkil edib.
Mayda təkrar avtomobil bazarında avtomobillərin ekspozisiya müddəti 2,6 faiz azalaraq 49 günə enib.
Ay ərzində təkrar avtomobil bazarında araşdırma predmeti olan 10 200-dən artıq avtomobilin 23,6%-i bazara məhz mayda təklif olunub. Digər 76,4%-i isə əvvəlki aylardan qalan avtomobillərdir. Bu isə son bir ildə idxalın azalması ilə yanaşı, alıcılıq qabiliyyətinin aşağı düşməsi və tələbin kəskin azalması ilə əlaqələndirilir. Əvvəlki aylardan fərqli olaraq köhnə avtomobillərin bazara kütləvi axın tendensiyası son 4 ayda xeyli azalıb və bu, bazarda təklif əmsalının kəskin artımının qarşısını alıb.
Uzun illərdir ki, təkrar bazarda liderliyi böyük fərqlə əldə saxlayan məşhur alman markası "Mercedes-Benz"in təklif üzrə payı aprel ayı ilə müqayisədə 1% artımla müşahidə edilib, bu markanın ümumi portfeldə payı 30,3% təşkil edib. Ümumilikdə ay ərzində ümumi təklif portfelini formalaşdıran 9 markanın əksəriyyəti üzrə təklifin azalması qeydə alınıb. Təklif üzrə ən çox azalma (10,5%) "Hyundai" markalı avtomobillərdə qeydə alınıb. Ən çox təklif artımı isə Rusiya istehsalı olan avtomobillər üzrə qeydə alınıb (3,5%). Araşdırmalar göstərir ki, ötən aylarda olduğu kimi, "Mercedes-Benz" ümumi təklif portfelində digər rəqiblərini hələ də böyük fərqlə geridə qoyur.
Ümumilikdə 9 markanın təklif üzrə payı 86,7% təşkil edib. Yerdə qalan 13,3%-i isə 20-dən artıq şirkətin istehsalı olan 80-dən artıq avtomarka arasında bölünür.
Təkrar bazara təqdim olunan avtomobillərin illər üzrə bölgüsündə ciddi dəyişikliklər baş verməyib. May ayında təklif portfelində ötən aydan fərqli olaraq nisbi azalma (1,8%) qeydə alınıb.
Ekspertlər hesab edirlər ki, ili köhnə olan avtomobillərin hələ də bazarda yüksək paya sahib olmasına baxmayaraq, yaxın gələcəkdə bazarda üstünlük 2003-cü ildən bu yana istehsal olunmuş avtomobillərə keçəcək.
Araşdırmanın digər bir seqmenti olan avtomobillərin ban tipinə gəldikdə isə, son ayların araşdırmaları bazarda "off-road" tipli avtomobillərə maraq göstərənlərin sayının artdığını göstərir. Buna baxmayaraq, son aylar monitorinqlər nəticəsində Rusiya istehsalı olan avtomobillərə marağın artdığı və alıcılıq qabiliyyətinin əsasən qiyməti ucuz olan avtomobillər ətrafında formalaşması tendensiyası müşahidə edilir.