...

Azərbaycanda aqrar sektorun güzəştli kreditləşdirilməsi artırılacaq - nazir

Biznes və iqtisadiyyat xəbərləri Materials 6 İyul 2011 17:37 (UTC +04:00)

Trend-i buradan izləyin

Azərbaycan, Bakı, 6 iyul /Trend, müxbir A.Axundov/

"2011-2013-cü illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı"nın həyata keçirilməsi çərçivəsində Azərbaycan İqtisadi İnkişaf Nazirliyi bu il müvafiq investisiya layihələrinin kreditləşmə həcmini artıracaq. Bu barədə çərşənbə günü Trend-ə iqtisadi inkişaf naziri Şahin Mustafayev deyib.

"Kreditlər verilən zaman bizim üçün əlverişli olan ölkə regionlarının inkişafına dəstək göstərilməsidir. Nəzərə alsaq ki, regionlarda əsasən kənd təsərrüfatı inkişaf edib, gələcəkdə aqrar sektora böyük diqqət yetiriləcək. Bu il kənd təsərrüfatı üçün daha çox kredit ayrılacaq", - Mustafayev bildirib.

Onun sözlərinə görə, ümumilikdə bu il İqtisadi İnkişaf Nazirliyi yanında Sahibkarlığa Kömək Milli Fondunun (SKMF) xətti ilə 125 milyon manat məbləğində güzəştli kreditin verilməsi planlaşdırılır.

Bu halda 91 milyon manat əvvəllər verilən kreditlərin qaytarılması, 34 milyon manat isə dövlət büdcəsinin vəsaitləri hesabına təmin ediləcək.

"Biz kreditləri planlaşdırılmış qaydada veririk. Konkret istiqamətlər üzrə sahibkarlar arasında tələb və təklif hesablanır. Bunun əsasında da proqnozlar verilir", - Mustafayev əlavə edib.

2011-ci ildə SKMF tərəfindən ümumilikdə sahibkarlıq subyektlərinin 743 investisiya layihəsinin maliyyələşdirilməsinə 61,9 milyon manat, o cümlədən yeni texnologiyaların tətbiqinə əsaslanan 42 irihəcmli investisiya layihəsinin maliyyələşdirilməsinə 53,2 milyon manat, 701 kiçik həcmli investisiya layihəsinin maliyyələşdirilməsinə isə 8,7 milyon manat güzəştli kredit vəsaiti verilib.

Bu dövrdə Bakı şəhəri və ətraf qəsəbələr üzrə 95 investisiya layihəsinin maliyyələşdirilməsinə 16,9 milyon manat güzəştli kredit verilib ki, bu vəsaitlər hesabına Bakı şəhəri və ətraf qəsəbələr üzrə 839 yeni iş yerinin yaradılması nəzərdə tutulur.

İyulun 6-na olan rəsmi məzənnə 0,7870 AZN/USD təşkil edir.

Xəbər lenti

Xəbər lenti