Azərbaycan, Bakı, 19 iyul /Trend, müxbir İ.Xəlilova/
Azərbaycan Nazirlər Kabinetinin qərarı ilə "Büdcə ili ərzində vahid xəzinə hesabında olan vəsaitin qalığının (sərbəst qalığın) idarəetməyə verilməsi Qaydaları"nda dəyişikliklər edilib.
Dəyişikliklərə əsasən, sərbəst qalıq vəsaitlərinin idarə edilməsi və ya idarəetməyə verilərək yerləşdirilməsi istiqamətlərinin müəyyən olunması Azərbaycan Maliyyə Nazirliyinin kollegiyası tərəfindən həyata keçirilir. Bu zaman idarəetməyə veriləcək sərbəst qalıq vəsaitlərinin (investisiya portfeli) proqnozlaşdırılan həcmi, likvidlik və kredit riskləri üzrə tələblər, habelə proqnozlaşdırılan sərbəst qalıq vəsaitlərinin gəlirlilik dərəcəsi nəzərdən keçirilməlidir.
Sərbəst qalıq vəsaitləri həmçinin Azərbaycan Respublikasında bank lisenziyasına malik kapitallaşma və aktivlərinin məbləği səviyyəsinə görə beynəlxalq kredit reytinqini almış ən iri beş kredit təşkilatında müddətli depozitlərə və ya bu kredit təşkilatları tərəfindən buraxılmış borc kağızlarına yerləşdirilir.
Sərbəst qalıq vəsaitlərinin idarə olunması məqsədi ilə bu sahəyə ixtisaslaşdırılmış yerli və xarici təsisatlar (menecerlər) cəlb edilir. Qaydalardan "xarici valyutada" sözləri çıxarılır.
Nazirlər Kabinetinin 2007-ci il 6 aprel tarixinə qərarına dəyişikliklər 18 iyul 2011-ci ildən, yəni imzalandığı andan qüvvəyə minir.
Azərbaycanda 44 bank fəaliyyət göstərir. 2010-cu ilin yekunları üzrə kapitallaşmanın səviyyəsinə görə ölkədə iri banklar beşliyinə Azərbaycan Beynəlxalq Bankı, Paşa Bank, Xalq Bank, AccessBank və Bank Standard, aktivlərin həcminə görə isə Azərbaycan Beynəlxalq Bankı, Kapital Bank, Xalq Bank, Bank Standard və Paşa Bank daxildir.
