Azərbaycan, Bakı, 25 iyul /Trend, müxbir A.Axundov/
Azərbaycanın yeganə dövlət kommersiya sığorta şirkəti olan "AzərSığorta"nın özəlləşdirilməsi məsələsində qeyri-müəyyənlik dövlət qurumlarının işçilərinin sığortalanması məsələsi ilə bağlıdır.
"İndi yeni qanunlar qəbul edilir, qüvvədə olan normativ-hüquqi aktlara dəyişikliklər edilir. Biz hələ ki bütün dövlət işçilərinə, hərbi qulluqçulara, məmurlara və s. xidmət göstəririk. Buna görə də biz özəlləşdirmə məsələsinə nə vaxt baxılacağını bilmirik", - Trend-ə şirkət sədrinin müavini Möhübbət Fərəcov deyib.
Bununla belə, o güman edir ki, bu məsələ yaxın vaxtlarda öz həllini tapmalıdır.
Bundan əvvəl şirkətin sədri Məmməd Məmmədovun dediyinə görə, Almaniyanın "Munich Re" şirkəti dövlət kommersiya sığorta şirkətində iştirakın alınmasına maraq göstərib.
"AzərSığorta"nın 100 faizlik dövlət şirkəti olması səbəbindən biz hər şeydən əvvəl hökumətlə xarici səhmdarın cəlb edilməsi planlarını razılaşdırmalıyıq", - Məmmədov bildirib.
Onun sözlərinə görə, şirkətin qeyri-dövlət şirkəti olması barədə qərar ölkə Prezidentinin sərəncamı əsasında ola bilər.
Hazırda şirkət sığortanın 28 növü üzrə xidmətlər göstərir. Şirkət ölkənin bütün regionlarında öz filial və nümayəndəliklərini açıb.
"AzərSığorta" sığorta şirkəti Sovet İttifaqı dağıldıqdan sonra 1992-ci ildə keçmiş Dövlət Sığorta İdarəsinin bazasında yaradılıb və respublikanın bütün şəhər və rayonlarında 80 sığorta agentliyinə malikdir.
Azərbaycan Maliyyə Nazirliyi yanında Dövlət Sığorta Nəzarəti Xidmətinin məlumatına görə, 2010-cu ildə şirkətin sığorta haqları 10,71 milyon manat ödənişlə 24,19 milyon manat təşkil edib. Yanvar-apreldə şirkət 7,047 milyon manat məbləğində sığorta haqqı yığıb, 3,216 milyon manat ödəniş edib.
İyulun 25-nə olan rəsmi məzənnə 0,7865 AZN/USD təşkil edir.
