Azərbaycan, Bakı, 29 iyul /Trend, müxbir A.Bədəlova/
Azərbaycanın sığorta şirkəti "Qarant Sığorta" 2011-ci ilin sonuna sığorta haqlarını 8-9 milyon manata çatdırmaq niyyətindədir. Bu barədə cümə günü mətbuat konfransında şirkətin idarə heyətinin sədri Fuad Allahverdiyev deyib.
"Bu, bizim məqsədimizdir və biz bu göstəriciyə nail olmaq üçün əlimzdən gələni edəcəyik", - Allahverdiyev bildirib.
2011-ci ilin ilk altı ayı ərzində şirkətin yığdığı sığorta haqları 3 milyon manata yaxın olub.
Allahverdiyevin sözlərinə görə, 2011-ci ilin ilk yarısında şirkətin filial şəbəkəsi genişləndirilib. Belə ki, fevralda Yasamal, "Gənclik" və Sumqayıt filiallarının açılışı olub. Yaxın vaxtlarda daha bir neçə filialın açılması planlaşdırılır.
"Bu sitiqamətdə işlər davam edir, araşdırmalar aparılır və ilin ikinci yarısında xüsusilə ölkə regionlarında azı 3 filialın açılması gözlənilir", - Allahverdiyev qeyd edib.
Onun sözlərinə görə, 2012-ci ilin birinci yarısında şirkətin strateji inkişaf planının hazırlanması planlaşdırılır. Ona əsasən, şirkətin məcmu kapitalı artırılacaq, yeni sığorta məhsulları hazırlanacaq, eləcə də şirkətin yeni stukturları yaradılacaq. O, strategiyanın daha uzun müddətə hazırlanması imkanını istisna etməyib, halbuki əvvəllər nəzərdə tutulmuşdu ki, plan 3-4 ilə hesablanacaq.
"Qarant Sığorta" sığorta şirkəti Azərbaycan Maliyyə Nazirliyindən sığorta fəaliyyətinə görə lisenziyanı 2007-ci ilin noyabrında alıb. "Qarant Sığorta" "ZQAN Holding"in tərkibinə daxildir.
İyulun 29-na olan rəsmi məzənnə 0,7866 AZN/USD təşkil edir.
