Azərbaycan, Bakı, 9 avqust / Trend , müxbir N.İsmayılova/
Azərbaycan bankı "Nikoil Bank" cari ilin payızında bazara islam bankçılığı üzrə yeni məhsul çıxaracaq. Bu barədə çərşənbə axşamı bankın Biznesin inkişafı departamenti yanında islam bankçılığı məhsullarının inkişafı üzrə aparıcı menecer Anar Yusufzadə deyib.
"Bankın hüquqşünasları islam bankçılığı üzrə yeni məhsulun hazırlanmasını başa çatdırırlar. Yeni məhsul təcili depozit olacaq. Onun bazara çıxarılması cari ilin noyabrına planlaşdırılır", - o bildirib.
Hazırda bazarda yeganə islam bankçılığı məhsulu bankın "Vadi yad Damana" məhsuludur. Məhsul əmanət depozitidir. Onun üstünə faizlər gəlmir, hesabdan vəsaitləri istənilən vaxtda götürmək olar. Bank məhsulu bazara cari ilin mayında çıxarıb.
Hazırda "Nikoil Bank" belə xidmət təklif edən ilk Azərbaycan bankıdır. Əvvəllər islam bankçılığı üzrə xidmətlərin göstərilməsi ilə bağlı "Amrahbank", "Turanbank", "Texnikabank" öz istəklərini bildirmişdilər. Azərbaycan Beynəlxalq Bankı hazırda islam bankçılığının tətbiqi üüzrə artıq məsləhətçini cəlb edib və müvafiq qanun hazırlanması təklifi ilə çıxış edib.
"Nikoil Bank" Azərbaycanda 1997-ci ildən fəaliyyət göstərir. 2008-ci ildə "Topaz İnvestments" şirkəti tərəfindən "Nikoil Bank"ın nəzarət paketi alındıqdan sonra səhmdarların iştirakı aşağıdakı kimidir: "Topaz İnvestments" - 53,1%, "Nikoil" QSC - 28,7%, "Uralsib-İnvest" MMC - 13,9% və "ISR Holding" - 4,3%.
Avqustun 9-na olan rəsmi məzənnə 0,7866 AZN/USD təşkil edir.