Azərbaycan, Bakı, 17 avqust /Trend, müxbir A.Axundov/
Azərbaycanın sığorta şirkəti "Azərbaycan Sənaye Sığorta" bu il 6,5 milyon manat məbləğində sığorta haqqı yığmağı planlaşdırır. Bu barədə Trend-ə şirkətin idarə heyətinin sədri İntiqam Seyfulla deyib.
Azərbaycan Maliyyə Nazirliyi yanında Dövlət Sığorta Nəzarəti Xidmətinin məlumatına görə, 2010-cu ildə şirkətlərin sığorta haqları 5,16 milyon manat, 2011-ci ilin birinci yarısında 2,278 milyon manat təşkil edib.
"Bizdə prioritet olan yüklərin sığortalanması və tikinti risklərinin sığortasıdır", - Seyfulla bildirib.
Onun sözlərinə görə, hazırda şirkətin yığımlarının 46 faizi yük sığortasının, 16 faizi tikinti riskləri sığortasının, 13 faizi tibbi sığortanın, 9 faizi yanğından icbari sığortanın, 5-6 faizi KASK-nun və digər növlərin payına düşür.
"Gələcəkdə tikinti risklərinin sığortası kəskin arta bilər, belə ki, bu, bizim hansı layihəni ala biləcəyimizdən asılı olacaq. Məsələn, ötən il bu növün payı bu ildəkindən çox olub", - Seyfulla qeyd edib.
Onun sözlərinə görə, "Azərbaycan Sənaye Sığorta"nın tikinti risklərini ödədiyi iri layihə Bakıda yeni aerovağzal kompleksinin tikintisidir. Tikintiyə martda start verilib.
Azərbaycanın sığorta şirkəti "Azərbaycan Sənaye Sığorta" Azərbaycan Sənaye Bankı tərəfindən 1996-cı ilin dekabrında yaradılıb. 2010-cu ildə bank öz səhmlərinin yarısını Azərbaycanın "Anadolu Investments" şirkətinə satıb.
"Anadolu Investments" konservləşdirilmiş məhsulun istehsalında ixtisaslaşan Türkiyənin "Anadolu Cam Investment" şirkətinin filialıdır. "Azərbaycan Sənaye Bankı" ASC-nin səhmlərinin 97 faizi "Anadolu Investments"ə məxsusdur.
Şirkət sığortanın 28 könüllü və 5 icbari növü üzrə xidmətlər göstərir. Şirkətin nizamnamə kapitalı 4,8 milyon manatdır.
Avqustun 17-nə olan rəsmi məzənnə 0,7865 AZN/USD təşkil edir.
