Azərbaycan, Bakı, 6 sentyabr /Trend, müxbir A.Axundov/
Türkiyədən Azərbaycana toxum tədarükünün dəyəri ildə 10 milyon dollara çata bilər. Bu barədə Trend-ə Türkiyə Toxum İstehsalçıları Birliyinin (TSÜAB) prezidenti İlhami Özcan Aygün bildirib.
"Hazırda Azərbaycana toxum ixracının həcmi çox azdır. Satış həyata keçirilir, lakin bu tədarüklər sistemləşdirilməyib. Biz bu məhsulların Azərbaycana ixracının həcminin 10 milyonadək çatdıra bilərik , - Aygün deyib.
Onun sözlərinə görə, ötən il Türkiyə 100 milyon dollar dəyərində toxum ixrac edib, 2023-cü ilədək bu göstəricinin 500 milyon dollara çatdırılması planlaşdırılır. Türkiyədə 500-dən artıq toxumçuluq şirkəti fəaliyyət göstərir.
"Biz istəyirik ki, beynəlxalq toxum tədarükü sistemi Azərbaycanda da qurulsun. Hesab edirəm ki, Azərbaycan məhsullarımızın iri satış bazarı olacaq", - Aygün qeyd edib.
Sentyabrın 4-dən 8-dək Türkiyənin toxum istehsalı ilə məşğul olan 24 şirkətinin, TSÜAB-ın, Ərzaq, Əkinçilik və Heyvandarlıq Nazirliyinin nümayəndələri Bakıda səfərdə olacaqlar.
