Azərbaycan, Bakı, 8 sentyabr /Trend, N.İsmayılova/
Azərbaycanda məcburi köçkünlərin iqtisadi inkişafına kömək üçün yeni layihənin hazırlanmasının tamamlanması məqsədilə sentyabrın 8-də layihə rəhbəri Coana de Berenin rəhbərliyi ilə Dünya Bankının (DB) missiyasının Bakıya səfəri başlayır. Bu barədə Trend-ə cümə axşamı bankın Bakıdakı nümayəndəliyindən məlumat veriblər.
"Sentyabrın 16-dək ölkədə olacaq missiyanın əsas məqsədi layihənin hazırlanması üzrə nəticə çıxarmaqdır, - nümayəndəlikdən bildiriblər. - Missiyanın işi qurtardıqdan sonra layihə üzərində iş tamamlanacaq və DB Direktorlar Şurasına təqdim olunacaq".
Dünya Bankı ümumi qiyməti 74,3 milyon dollar olan layihə üçün 50 milyon dollar ayırmağa hazırdır. Azərbaycan hökuməti layihənin 25 faizini maliyyələşdirəcək.