Azərbaycanda korporativ istiqrazların yüksək gəlirliliyi yeni emitentlərin meydana çıxmasını stimullaşdırır
Azərbaycan, Bakı, 16 sentyabr /Trend, müxbir N.İsmayılova/
Azərbaycanda korporativ istiqrazların təkrar bazarında gəlirliliyin yüksək səviyyəsi bazara yeni emitentlərin çıxması üçün stimul ola bilər. Bu barədə Trend-ə cümə günü "Paşa Bank"ın idarə heyətinin sədri Fərid Axundov deyib.
"Biz ölkədə şirkətlərə kapital bazarına çıxışa yardım göstərməkdə və qiymətli kağızların təkrar bazarının dərinləşməsi kimi istiqamətlərdə qiymətli kağızlar bazarının inkişafının dəstəklənməsində maraqlıyıq", - Axundov deyib.
Onun sözlərinə görə, ölkənin institusional investorları, banklar, sığorta və lizinq şirkətləri bu gün "Paşa Bank"ın dövlət qiymətli kağızlarından aktiv şəkildə istifadə edirlər, həmçinin, korporativ emitentlərin istiqrazlarının buraxılışı və likvidliyinin dəstəklənməsi hesabına təkrar bazarın dərinləşməsində maraqlıdırlar.
"Biz hesab edirik ki, gəlirliliyin daha yüksək səviyyəsi yeni emitentlərin bazara çıxışı üçün stimul ola bilər. Bank hazırda bir neçə potensial korporativ emitentlərlə istiqrazların buraxılışı və gündəlik əsasda təkraa bazarda onların likvidliyinin dəstəklənməsi üzrə işləyir", - Axundov deyib.
Onun sözlərinə görə, ölkənin qiymətli kağzılar bazarının inkişafını stimullaşdıran daha bir amil qanunvericiliyin tətbiqi və şirkətlərin şəffaflığının artırılmasıdır.
Bank əvvəllər "Unileasing" şirkətinə 2011-ci il mayın 31-də onun istiqrazlarının yerləşdirilməsində anderrayter və marketmeyker xidmətləri göstərib. Beş milyon manat həcmində istiqraz 1,5 il müddətinə 10 faiz dərəcəsi üzrə yerləşdirilib. "Paşa Bank" Bakı Fond Birjasında "UniCapital" şirkəti vasitəsilə emissiyaların yerləşdirilməsinin anderrayteri qismində çıxış edib.
"Paşa Bank" 2007-ci ilin iyununda yaradılıb və Azərbaycan Mərkəzi Bankının lisenziyası əsasında 2007-ci il yanvarın 28-dən fəaliyyət göstərir.
Sentyabrın 16-na rəsmi məzənnə 0,7867 AZN/USD təşkil edir.
