Azərbaycan, Bakı, 20 sentyabr /Trend, müxbir A.Axundov/
Azərbaycan məhsullarının ixracının stimullaşdırılması üçün hələ də Avropa və dünya standartlarının işləmədiyi yeni bazarları öyrənmək lazımdır. Trend-in məlumatına görə, bunu Azərbaycan Marketinq Cəmiyyətinin rəhbəri Rəhim Hüseynov deyib.
"Ən azından, MDB ölkələri, Afrika, bəzi Asiya ölkələrinin hələ də dünya standartlarının cüzi və ya heç işləmədiyi bazarlarını öyrənmək lazımdır. Bu bazarları tutmaq lazımdır, çünki biz gecikə bilərik və bunları başqa ölkələr tutar", - Hüseynov jurnalistlərə deyib.
Onun sözlərinə görə, bu bazarların monitorinqini aparıb nəticələri iş adamlarına təqdim etmək lazımdır.
"Bunun üçün ciddi vəsait və dövlət dəstəyi lazımdır", - Hüseynov deyib.
Onun sözlərinə görə, bununla yanaşı, yaxın və uzaq xaric ölkələrində ticarət tədqiqatları da aparmaq lazımdır.
"Azərbaycanda ixracı dəstəkləmək üçün mütəxəssis lazımdır: ixracat mühəndisləri, menecerlərlə yanaşı, bu ixtisas üzrə kadrlar hazırlamaq lazımdır. Bunun üçün dörd və ya altı il təhsil lazım deyil. İqtisadçının 3-5 aylıq kurs keçməsi kifayətdir və eyni zamanda, bu kursların təşkili üçün insanlar və vəsait lazımdır", - Cəmiyyət rəhbəri deyib.
Bazar ertəsi Azərbaycan Marketinq Cəmiyyəti Azərbaycan İxracat Kataloqunu təqdim edib.
Dövlət Gömrük Komitəsinin məlumatına əsasən, 8 ay ərzində Azərbaycanın ixrac əməliyyatları 17,798 milyard dollar təşkil edib ki, bu, keçən ilin müvafiq dövrilə müqayisədə 27,59 faiz çoxdur.
Ölkənin ümumi əmtəə mübadiləsi 23,661 milyard dollar olub, bu, keçən ilki göstəricini 31,66 faiz ötüb.
Xarici ticarət əməliyyatlarında 11,935 milyard dollarlıq müsbət saldo yaranıb.