Azərbaycan, Bakı, 21 sentyabr /Trend, müxbir N.İsmayılova/
Azərbaycanda qızıl istehsalçısı "Anglo Asian Mining Plc" 2011-ci ilin birinci yarısında ilk mis konsentratı satışını həyata keçirib. Trend-in məlumatına görə, bu barədə şirkətin çərşənbə günü yaydığı məlumatda deyilir.
Məlumata görə, şirkəthasil olunmuş 90 ton mis, 29 132 unsiya gümüş və 335 unsiya qızılın 87,25 faizinin satışından 2,1 milyon dollar məbləğində gəlir əldə edib.
İlin ikinci yarısının başlanması ilə satışı yaxın aylarda başa çatacaq mis konsentratının tədarükü də həyata keçirilib.
2011-ci il avqust ayının sonuna olan məlumata görə, mis konsentratı ehtiyatları 383 ton mis, 2422 kq gümüş və 3 kq qızıldır.
"Biz hökumət, tərəfdaşlar və potensial müştərilərlə bu ehtiyatın satışı ilə bağlı danışıqlar aparırıq və yaxın gələcəkdə onun satışına dair sazişin imzalanacağına ümid edirik", - məlumatda deyilir.
"Anglo Asian Mining Plc" şirkəti 1997-ci ilin avqustunda Azərbaycan hökuməti ilə imzalanmış müqaviləyə əsasən, Azərbaycanın cənub-qərbindəki altı yataqda - Gədəbəy, Ordubad, Qoşa Bulaq, Qızıl Bulaq, Vejnəli və Söyüdlüdə işləmək hüququna malikdir.
Azərbaycan hökuməti ilə Azərbaycan Beynəlxalq Mədən Əməliyyatı Şirkəti arasında 30 il müddətinə imzalanan hasilatın pay bölgüsü haqqında müqavilədə Azərbaycanın pay hissəsi 51 faiz, Böyük Britaniyanın "Anglo-Asian Mining Plc" şirkətinin pay hissəsi isə 49 faizdir.
Müqaviləyə əsasən, yataqlardan 400 ton qızıl, 2500 ton gümüş və 1,5 milyon ton mis hasil etmək planlaşdırılır.
İlk qızıl və gümüş 2009-cu ilin mayında "Gədəbəy" yatağından hasil edilib. Ümumilikdə 2015-ci ilədək "Gədəbəy" yatağından 300 min unsiya qızılın hasil edilməsi planlaşdırılır.