Azərbaycan, Bakı, 29 oktyabr /Trend, müxbir E.İsmayılov/
Noyabrın 1-dən "Məşədi Əzizbəyov" metrostansiyası stansiyanın yenidən qurulması üzrə aparılan işlər səbəbindən tamamilə bağlanacaq. Trend-in məlumatına görə, bu barədə şənbə günü stansiyada yerləşdirilən elanda deyilir.
Bu müddətdə stansiya sərnişinlərə xidmət göstərməyəcək.
Bakı Metropolitenindəki mənbənin əvvəl dediyinə görə, "Məşədi Əzizbəyov" stansiyasının çıxışlarının tamamilə yenidən qurulması prosesinin ilin sonuna qədər başa çatdırılması planlaşdırılır.
Bakı Metropoliteni 1967-ci ildən fəaliyyət göstərir və hazırda 23 stansiyası var.
Bu işlər Bakı Metropoliteninin 20 illik inkişaf proqramı çərçivəsində aparılır. Həmin uzunmüddətli inkişaf sxeminə əsasən, gələcəkdə Bakı Metropoliteninin ümumi şəbəkəsi 5 xətdən - hazırkı 2 xətt və yeni 3 xətt - və uzunluğu 119 km olan metro xəttində yerləşən 76 stansiyadan ibarət olacaq. Yəni proqram 53 yeni stansiya və 84,3 km metro yolunun tikilməsini nəzərdə tutur. Yeni stansiyaların tikintisi zamanı yer seçimində inteqrasiya məsələləri və digər sərnişin nəqliyyatının növlərinin çoxfunksionallı nəqliyyat kompleksi ilə uyğunlaşmalari da nəzərə alınıb.