Azərbaycan, Bakı, 4 noyabr /Trend, müxbir N.İsmayılova/
Bakıda Latviyanın lizinq şirkəti "Baltikums Līzings"in nümayəndəliyinin açılması Latviya şirkətlərinin Azərbaycanda işgüzar fəallığının artmasının nəticəsidir. Bu barədə cümə günü Trend-ə nümayəndəliyin rəhbəri Mixail Qriqoryev deyib.
"Belə ki, Azərbaycan ilə Latviya arasında əlaqələr uğurla inkişaf edir. Bununla yanaşı, bu ölkədə müştərilərimizin işgüzar fəallığı artır və biz qərar qəbul etdik ki, müştərilərimizi izləmək lazımdır. Burada məqsəd onlara lazımi xidmətləri göstərməkdir", - Qriqoryev bildirib.
Onun sözlərinə görə, hazırda şirkət Azərbaycan bazarını fəal şəkildə öyrənir və hələlik nümayəndəliyi törəmə struktura çevirməyin lazım olub-olmadığını müəyyənləşdirməyib.
"Lizinq Azərbaycanda getdikcə daha məşhur olur və biz gələcəkdə bazarın bu seqmentinin artımını güman edirik", - o deyib.
Qriqoryevin sözlərinə görə, "Baltikums Līzings" Azərbaycandakı müştərilərinə aktivlərin idarə edilməsi, vəkalət əməliyyatları, əmanətlərin sığortalanması kimi və digər maliyyə xidmətləri göstərəcək.
"Lizinq şirkətinin nümayəndəliyinin açılması barədə qərar onunla bağlıdır ki, bu, müştərilərə bank kimi təxminən eyni xidmətləri göstərə bilər", - o deyib.
Şirkətin nümayəndəliyi 2011-ci ilin oktyabrın 20-də qeydiyyatdan keçib və Bakıda yerləşəcək. "Baltikums Līzings" lizinq şirkətinin yüz faizlik səhmdarı Baltikims Bank AS-dir. Bank Riqada yerləşən çoxsaylı törəmə müəssisələrinin əsas səhmdarıdır və "Baltikums" (Konsern) qrupuna daxildir. Bank, həmçinin, assosiativ müəssisisədə əmanətlərə malikdir.
Əvvəl Bakıda "Baltikums Bank"ın nümayəndəliyi fəaliyyət göstərib.
Hazırda Azərbaycanda lizinq xidmətlərini "AqroLizinq" dövlət lizinq şirkəti, 22 özəl lizinq şirkəti və bank göstərir. Ölkədə lizinq əməliyyatlarının portfeli 2003-cü ildə 2,5 milyon dollardan 2010-cu ildə 165 milyon dollara yüksəlib.
Noyabrın 4-nə olan rəsmi məzənnə 0,7868 AZN/US təşkil edir.
