Azərbaycan, Bakı, 10 noyabr /Trend, müxbir S.Ağayeva/
Ticari-iqtisadi əməkdaşlıq üzrə Azərbaycan-Bolqarıstan hökumətlərarası komissiyasının əvvəllər noyabrın ortalarına təyin edilmiş növbəti iclası gələn ilə keçirilib.
"Azərbaycan tərəfinin təklifi üzrə hökumətlərarası komissiyanın iclası gələn ilin yanvar-fevral aylarında Bakıda keçiriləcək", - bu barədə cümə axşamı Trend-ə Bolqarıstanın Azərbaycandakı səfiri Vasil Kalinov məlumat verib.
İclasda ikitərəfli iqtisadi münasibətlərin inkişaf perspektivləri, habelə birgə layihələrin həyata keçirilməsinin müzakirəsi planlaşdırılır.
Azərbaycanın iqtisadi inkişaf naziri Şahin Mustafayevin sentyabrda keçirilən Azərbaycan-Bolqarıstan biznes forumunda dediyi kimi, hər iki ölkə tikinti, elektrik avadanlıqlarının istehsalı, alternativ enerji mənbələrindən istifadə, toxuculuq və qida sənayesi, eləcə də nəqliyyat kimi sahələrdə əməkdaşlığın inkişafı üçün böyük imkanlara malikdir.
Nazir iş adamlarını qarşılıqlı əlaqələrin nizamlanmasında fəal iştiraka çağırıb.
"Azərbaycanla Bolqarıstan arasında əməkdaşlığın gələcək inkişafı üçün etibarlı hüquq-müqavilə bazası yaradılıb. İki ölkə arasında iqtisadi sahədə 10-dan artıq saziş imzalanıb və onların arasında ən mühümü ticarət sahəsindəki sazişdir", - Mustafayev deyib.
Bolqarıstanın iqtisadiyyat, energetika və turizm naziri Trayço Traykovun sözlərinə görə, ölkəsi Avropa bazarları üzrə genişlənmə üçün nisbətən ən rahat platformadır. "Bizdə vergi dərəcələri aşağı və inzibati qaydalar sadədir. Bolqarıstan ölkədə biznes qurmaq üçün yaxşı keyfiyyət və qiymət nisbətinə malikdir", - Traykov deyib.
Onun sözlərinə görə, Azərbaycan və Bolqarıstan şirkətləri ekologiya, elektrotexnika, tikinti və logistika, toxuculuq və qida sənayesi sahələrində uğurla əməkdaşlıq edə bilərlər.
Dövlət Statistika Komitəsinin məlumatına görə, 2011-ci ilin yanvar-sentyabrında Azərbaycanla Bolqarıstan arasında əmtəə mübadiləsi ötən ilin müvafiq dövrü ilə müqayisədə üç dəfə artaraq 301,29 milyon dollar təşkil edib. Belə artım ixrac əməliyyatlarının 3,2 dəfə artması hesabına təmin olunub.
