Azərbaycan, Bakı, 11 noyabr /Trend, müxbir A.Axundov/
Bakının torpaq bazarında təklifin əhəmiyyətli dərəcədə azalması müşahidə edilir. Bu barədə cümə günü Trend-ə "MBA Group" konsaltinq şirkətinin baş direktoru Nüsrət İbrahimov deyib.
"2009-cu illə müqayisədə torpaq bazarında təklif 22 faiz azalıb. Əgər 2009-cu ilin noyabrında 1000-1100 torpaq sahəsi təklif olunubsa, hazırda 800 sahə təklif edilib. Bu, satışa rəsmiləşdirilməmiş torpaq sahələrinin çıxarılmasının çətinləşməsi ilə bağlıdır", - İbrahimov bildirib.
Onun sözlərinə görə, bir və ikiotaqlı mənzillərin təklif edilməsində də azalma müşahidə edilir.
"Bu onunla bağlıdır ki, belə mənzillərin çoxu ipoteka krediti hesabına alınır", - İbrahimov deyib.
Dəgər tərəfdən, ilkin mənzil bazarında təklifin artması müşahidə edilir.
"Əgər ötən ilin noyabrında satışda 421 yeni tikili var idisə, hazırda onların sayı 440-a çatıb, yəni 5-6 faiz artım müşahidə edilir", - o bildirib.
Kommersiya obyektlərinin icarə bazarında da təklif artıb.
"İl ərzində təklif 20 faizə qədər artıb. Bu onunla əlaqədardır ki, həmin obyektlərin gəlirliliyi aşağı düşüb", - İbrahimov deyib.
