...

Avropada böhran ARDNŞ-nin avrobondlar buraxmaqla bağlı planlarına təsir edə bilər

Biznes və iqtisadiyyat xəbərləri Materials 11 Noyabr 2011 14:26 (UTC +04:00)

Azərbaycan, Bakı, 11 noyabr / Trend, müxbir E.İsmayılov /

ARDNŞ (Azərbaycan Respublikası Dövlət Neft Şirkəti) Avropadakı böhranlı vəziyyətlə əlaqədar avrobondların buraxılışını məqsədəuyğun hesab etmir. Trend-in məlumatına görə, bu barədə cümə günü jurnalistlərə ARDNŞ-nin rəhbəri Rövnəq Abdullayev deyib.

"Hazırda mütəxəssislərimiz avrobondların buraxılışı planları ilə bağlı Avropa bankları ilə görüşlər keçirirlər. İlin sonunadək biz avroistiqrazların yerləşdirilməsi vasitəsilə borcların cəlb edilməsini istərdik, lakin böhran dövründə bu məqsədəuyğun olmazdı. Böhran dövründə öz qiymətli kağızlarının beynəlxalq kapital bazarlarında yerləşdirilməsinə düşünərək və ölçüb-biçərək yanaşmaq lazımdır", - Abdullayev bildirib.

Onun sözlərinə görə, avroistiqrazların buraxılışı ARDNŞ-nin iri investisiya layihələrinin reallaşdırılmasına hazırlıq mərhələsidir və cəlb edilən vəsaitlər bu layihələrdən bəzilərində istifadə oluna bilər.

"Lakin ARDNŞ-nin 500 milyon dollar həcmində buraxmaq istədiyi avrobondlar daha çox Dövlət Neft Şirkətinin imici üçün vacibdir", - Abdullayev deyib.

RBS (Royal Bank of Scotland), Sity bank və Deutsche bank ARDNŞ-nin (Azərbaycan Respublikası Dövlət Neft Şirkəti) avrobondlarının ilkin buraxılışının təşkilatçısı kimi çıxış edirlər.

Xəbər lenti

Xəbər lenti