Azərbaycan, Bakı, 23 noyabr /Trend, müxbir T.Cəfərov/
Xarici ölkələr İranın hava nəqliyyatında yük və sərnişin daşımalarında iştirak edə və sərmayə yatıra bilərlər. Bunu İran parlamentinin Mülki işlər üzrə komissiyasının aviasiya komitəsinin sədri Məhəmmədtəqi Bəxtiyari deyib. Bu barədə Trend İranın İRNA dövlət xəbər agentliyinə istinadən məlumat verir.
Bəxtiyari bildirib ki, ölkənin beşinci inkişaf proqramında xarici ölkələrin İranın hava nəqliyyatında yük və sərnişin daşımalarında iştirak etməsinə icazə verilir.
Onun sözlərinə görə, xarici ölkələrin aviasiya şirkətləri İranda beynəlxalq standartlara uyğun qiymətlərlə fəaliyyət göstərə bilərlər. "İlk növbədə, həmin şirkətlər İrana beynəlxalq uçuşları həyata keçirə bilərlər, daha sonra onlar üçün digər şərtlər də açıqlanacaq", - Bəxtiyari deyib.
Komitə sədri qeyd edib ki, İran hazırda "Qətər Online" aviasiya şirkəti ilə İranın hava nəqliyyatında xidmətlər göstərməsi üçün müzakirələr aparır. "Bu sahədə heç bir məhdudiyyət yoxdur, bütün ölkələr İranın hava nəqliyyatında xidmət göstərə bilər", - o əlavə edib.
