Azərbaycan, Bakı, 1 dekabr /Trend, müxbir E.İsmayılov/
Bakı Metropoliteni 2013-cü ilin sonunadək daha iki yeni - "Avtovağzal" və "Memar Əcəmi-2" stansiyasını istismara verməyi planlaşdırır. Bu barədə Trend-ə cümə axşamı Bakı Metropolitenindəki mənbə məlumat verib.
Onun sözlərinə görə, artıq "Avtovağzal" stansiyasından "Memar Əcəmi-2" stansiyası istiqamətində iki tunelin çəkilişinə başlanıb.
"Tunellərin çəkilişi üzrə işlər ABŞ və Almaniya istehsalı olan iki yeni qurğudan istifadə olunmaqla aparılır", - mənbə deyib.
Onun sözlərinə görə, hazırda tunellərdən birinin uzunluğu 600 metr, ikincisinin isə 300 metr təşkil edir.
"Hər iki stansiyanın artıq 2013-cü ilin sonunda istismara verilməsi planlaşdırılır", - mənbə bildirib.
Bakı Metropoliteni 1967-ci ildən fəaliyyət göstərir və hazırda 23 stansiyası var.
Bu işlər Bakı Metropoliteninin 20 illik inkişaf proqramı çərçivəsində aparılır. Həmin uzunmüddətli inkişaf sxeminə əsasən, gələcəkdə Bakı Metropoliteninin ümumi şəbəkəsi 5 xətdən - hazırkı 2 xətt və yeni 3 xətt - və uzunluğu 119 km olan metro xəttində yerləşən 76 stansiyadan ibarət olacaq. Yəni proqram 53 yeni stansiya və 84,3 km metro yolunun tikilməsini nəzərdə tutur. Yeni stansiyaların tikintisi zamanı yer seçimində inteqrasiya məsələləri və digər sərnişin nəqliyyatının növlərinin çoxfunksionallı nəqliyyat kompleksi ilə uyğunlaşmaları da nəzərə alınıb.