Azərbaycan, Bakı, 6 dekabr /Trend, müxbir N.İsmayılova/
Azərbaycan və Pakistan qarşılıqlı mal dövriyyəsinin həcminin artırılmasına çalışırlar. Bu barədə çərşənbə axşamı Trend-ə Pakistanın iqtisadi məsələlər və statistika nazirinin birinci müavini Himayətullah Xan deyib.
Dekabrın 6-7-də Bakıda ticari-iqtisadi əməkdaşlıq üzrə Azərbaycan-Pakistan hökumətlərarası komissiyasının V iclası keçirilib.
"Biz iclas çərçivəsində neft, təbii ehtiyatlar, enerji və bank sahələri kimi bir sıra sektorlarda əməkdaşlığın perspektivlərini müzakirə etdik. Azərbaycan və Pakistan arasında siyasi münasibətlər yüksək səviyyədədir, lakin mal dövriyyəsi buna uyğun gəlmir", - o deyib.
Xanın sözlərinə görə, iclas çərçivəsində tərəflər qarşılıqlı ticarətin həcminin artırılması yollarını tapmağa çalışacaqlar. "Biz bir sıra tədbirlərin həyata keçirilməsi yolu ilə vəziyyəti yaxşılaşdırmağa çalışacağıq", - o qeyd edib.
Bir müddət əvvəl Azərbaycanın Pakistandakı səfiri Daşqın Şikarov Pakistanın "Centreline" qəzetinə müsahibəsində deyib ki, Azərbaycan hökumətinin Pakistanla iqtisadi əlaqələrin inkişafı ilə bağlı konkret təkliflər paketi var. Bakı Pakistanla ticari-iqtisadi əlaqələri genişləndirməyə hazırdır və bu ölkəyə ixrac olunan malların siyahısını neft məhsullarının, sürtkü materiallarının, kimyəvi preparatların, kənd təsərrüfatı məhsullarının bəzi növləri hesabına artıra bilər.
Azərbaycan Dövlət Gömrük Komitəsinin məlumatında deyilir ki, 2011-c il sentyabrın sonuna olan vəziyyətə görə, iki ölkə arasında mal dövriyyəsi 2658,34 min dollar təşkil edib ki, bu da 2010-cu ilin analoji dövr göstəricisini (1822,18 min dollar) 46 faiz üstələyir.
