Azərbaycan, Bakı, 8 dekabr /Trend, müxbir N.İsmayılova/
Avropa Yenidənqurma və İnkişaf Bankının (AYİB) Direktorlar Şurası Azərbaycanda iri yol layihəsinin reallaşdırılmasını təqdir edib. Bu barədə Trend-ə cümə axşamı bankdan məlumat verilib.
Direktorlar Şurasının iclası dekabrın 6-da keçirilib. AYİB-in təqdim etdiyi maliyyələşmənin ümumi məbləği üç bərabər tranşa ayrılacaq 750 milyon dollar təşkil edir. Layihənin ümumi məbləği 900 milyon dollardır.
Bankdan bildiriblər ki, layihə üzrə sazişin imzalanma müddəti hələ müəyyən edilməyib.
Təklif edilən layihənin əsas məqsədi aparıcı regional magistral yolların, dəhlizlərin və ya bilavasitə Gürcüstan və İranla həmsərhəd olan yolların yenidən qurulmasına yardımdan ibarətdir.
2009-cu ildə AYİB Azərbaycanda ümumi məbləği 232 milyon dollar olan doqquz layihəyə sərmayə qoyub. 2010-cu ildə AYİB 79 milyon dollarlıq 13 layihəni maliyyələşdirib. 2011-ci ildə bank 14 layihənin həyata keçirilməsinə 90 milyon dollar vəsaitin ayrılmasını planlaşdırır.
AYİB vəsaitlərindən Mərkəzi Avropa və Mərkəzi Asiyanın 30 ölkəsində demokratiyanın və bazar iqtisadiyyatının qurulması məqsədilə istifadə olunan maliyyə institutudur. 61 ölkə və iki beynəlxalq təşkilat bankın sahibidir.