Azərbaycan, Bakı, 26 dekabr /Trend, müxbir A.Axundov/
Azərbaycanda təxminən 50 şəhərin baş planı işlənməlidir. Trend-in məlumatına görə, bu barədə bazar ertəsi Dövlət Şəhərsalma və Arxitektura Komitəsinin sədri Abbas Ələsgərov hakim Yeni Azərbaycan Partiyasının saytında dərc edilən müsahibəsində deyib.
"Komitə Hazırda Gəncə, Sumqayıt, Xırdalan və Şəki şəhərlərinin baş plan layihələri üzərində iş aparır", - Ələsgərov bildirib.
Onun sözlərinə görə, Dövlət Komitəsinin şifarişi ilə 21 rayon mərkəzinin baş planları başa çatdırılıb.
Komitə sədrinin müavini Dövlətxan Dövlətxanovun əvvəl Trend-ə dediyinə görə, Dövlət Komitəsi ölkənin beş iqtisadi rayonunun inkişaf planlarının hazırlanması üzrə iş aparır.
"Bu, Gəncə-Qazax, Quba-Xaçmaz, Şəki-Zaqatala, Lənkəran və Aran iqtisadi rayonlarıdır. Biz onların hazırlanması üzrə işləri gələn il başa çatdırmağı planlaşdırırıq. Razılaşdırma məsələlərini proqnozlaşdırmaq çətindir, lakin ümumilikdə 2013-cü ildə bütün bu planlar qəbul ediləcək. 2012-ci ildə biz bu istiqamətdə işləri davam etdirəcəyik, həmçinin, yeni regionlar üzrə işlərin aparılması üçün tender prosesinə başlayacağıq. Bu regional inkişaf planları faktiki olaraq, yaxın 20 il ərzində regionların inkişafının strateji planlarıdır", - Dövlətxanov deyib.
Onun sözlərinə görə, həmçinin, Balakən, Nefçala, Siyəzən və başqa rayon mərkəzlərinin baş planları üzərində iş başlayacaq.
"Gələn il bu işlərin yerinə yetirilməsi üçün Dövlət Komitəsinə 3 milyon manat ayrılıb. Biz hazırda hökumətə təqdim edəcəyimiz mövcud vəsaitlərin smeta gəlirlərinin hazırlanması üzərində işləyirik", - Dövlətxanov qeyd edib.
