Azərbaycan, Bakı, 26 dekabr /Trend, müxbir N.İsmayılova/
Ümumdünya Ticarət Təşkilatının (ÜTT) Katibliyi və Azərbaycan üzrə işçi qrupunun üzvü olan ölkələr çoxtərəfli danışıqların doqquzuncu raundunun keçirilmə tarixini müəyyənləşdiriblər. Trend-in məlumatına görə, bu barədə bazar ertəsi danışıqlar qrupunun rəhbəri, Azərbaycan xarici işlər nazirinin müavini Mahmud Məmmədquliyev deyib.
"Çoxtərəfli danışıqların növbəti mərhələsi fevralın 24-də Cenevrədə keçiriləcək", - nazir müavini deyib.
Azərbaycanın ÜTT ilə çoxtərəfli danışıqlarının növbəti mərhələsi çərçivəsində üzv ölkələr üçün Azərbaycanın təklifi üzrə "Factual Summary" yeni toplu hesabatı müzakirə olunacaq. Azərbaycan hökuməti əvvəllər ÜTT-yə üzv olan dövlətlərin suallarına cavablarını Katibliyə təqdim edib. Bunun əsasında Katiblik "Factual Summary" adlı hesabat hazırlayıb. Sənəd Azərbaycanın ÜTT-yə üzv olması üzrə gördüyü işlər barədə hesabatı əhatə edir.
Sonuncu görüş (çoxtərəfli danışıqların səkkizinci raundu) 2010-cu il oktyabrın 18-də Cenevrə şəhərində keçirilib. Həmin il oktyabrın 19-22-də isə ABŞ, Aİ, Kanada, Yaponiya, Norveç, İsveçrə, Çinin Tayvan əyaləti və ÜTT-nin digər üzvləri ilə mal və xidmət məsələləri üzrə ikitərəfli görüşlər keçirilib.
2011-ci il iyulun 25-29-da Azərbaycan nümayəndə heyəti Cenevrədə bir sıra ölkələrlə, o cümlədən Aİ, Ekvador, İsveçrə, Braziliya və Çinlə ikitərəfli görüşlər keçirib. ABŞ çoxtərəfli danışıqların gedişatında Azərbaycanın işçi qrpu ilə görüşmək istəyini bildirib.
Nazir müavini ÜTT-nin üzv ölkələri ilə növbəti ikitərəfli danışıqların vaxtını söyləməkdə çətinlik çəkib. "Yaxın vaxtlarda ikitərəfli danışıqların keçirilməsi gözlənilmir, sonuncu görüş iyulda olub", - Məmmədquliyev deyib.
Hazırda Azərbaycan ABŞ, Yaponiya, Braziliya, Ekvador, Şri-Lanka, Avropa İttifaqı, Norveç, Hindistan, Cənubi Koreya, Çinin Tayvan vilayəti ilə danışıqlar prosesindədir.
Azərbaycan danışıqlara 2004-cü ildə qoşulub.
Bu günədək Azərbaycan Türkiyə, Oman Sultanlığı, Birləşmiş Ərəb Əmirlikləri, Gürcüstanla danışıqları başa çatdırıb və protokollar imzalanıb. Ölkə hələ sənədləri nəzərdən keçirən Moldova ilə protokolun imzalanma mərhələsindədir, Qırğızıstan isə imzalanmaya razılıq verib.
Danışıqlar çərçivəsində Azərbaycan milli hüquq bazasının ÜTT-nin tələblərinə uyğunlaşdırılması, mövcud ticarət rejiminin təkmilləşdirilməsi işini davam etdirir. Təxminən 40-50 qanunvericilik aktı təşkilatın tələblərinə uyğunlaşdırılmalıdır. Onlardan təxminən 30 sənəd artıq vahid şəklə salınıb. Gələn il bu istiqamətdə işlər davam etdiriləcək.
ÜTT Katibliyi yanında Azərbaycan üzrə işçi qrupu 1997-ci il iyulun 16-da yaradılıb.
Azərbaycan 1997-ci ildən Ümumdünya Ticarət Təşkilatında müşahidəçi statusunda təmsil olunur.
