Azərbaycan, Bakı, 25 yanvar /Trend, müxbir N.İsmayılova/
Çərşənbə günü Avropa Yenidənqurma və İnkişaf Bankının (AYİB) bələdiyyə infrastrukturu və ətraf mühit üzrə direktor müavini Lin Oqredinin (Lin O'Grady) rəhbərlik etdiyi missiya Bakıya gəlib. Bu barədə çərşənbə günü Trend-ə bankdan məlumat verilib.
AYİB mütəxəssisləri ikigünlük səfər zamanı "Azərsu" ASC-nin Asiya İnkişaf Bankının, Dünya Bankının nümayəndələri və AYİB-in ölkədəki tərəfdaşları ilə əməkdaşlıq məsələlərini müzakirə etmək məqsədilə görüşəcəklər.
2011-2013-cü illəri əhatə edən qüvvədə olan strategiya çərçivəsində bank sonrakı illər üzrə maliyyələşdirmə üçün ölkənin neft sektorunu deyil, aqrar biznesi, eləcə də əsas nəqliyyat, energetika, infrastruktur layihələrin maliyyələşdirilməsində öz iştirakının artırılmasını nisbətən prioritet istiqamət edir.
AYİB ölkədə fəaliyyət göstərdiyi vaxtdan Azərbaycan iqtisadiyyatına 115 layihənin reallaşdırılmasına 1,2 milyard avro ayırıb. Bankın cari portfeli 579,1 milyon avro təşkil edir. İnvestisiyaların 44 faizi Azərbaycanın enerji sektoruna, 23 faizi korporativ sektora yönəlib. Maliyyə sektorunda 70 layihə reallaşdırılıb.
Hazırda AYİB ölkədəki doqquz bank, altı mikromaliyyələşdirmə təşkilatı və üç bank olmayan kredit təşkilatı ilə əməkdaşlıq edir. 2009-cu ildə AYİB Azərbaycanda ümumi məbləği 232 milyon dollar olan doqquz layihəyə sərmayə qoyub. 2010-cu ildə AYİB 79 milyon dollarlıq 13 layihəni maliyyələşdirib. 2011-ci ildə bank 14 layihənin həyata keçirilməsinə 90 milyon dollar vəsait ayrılmasını planlaşdırır.
Bank vəsaitlərindən Mərkəzi Avropa və Mərkəzi Asiyanın 30 ölkəsində demokratiyanın və bazar iqtisadiyyatının qurulması məqsədilə istifadə olunan maliyyə institutudur. 61 ölkə və iki beynəlxalq təşkilat onun sahibidir.
