Azərbaycan, Bakı, 26 yanvar /Trend, müxbir E.İsmayılov/
Bakıda nəqliyyatı intellektual idarəetmə sistemi çərçivəsində avadanlıqların funksional baxımdan birgə fəaliyyətinin nizamlanması prosesi 2012-ci ortalarına qədər davam edəcək. Bu barədə cümə axşamı Trend-ə Nəqliyyat Nazirliyindən məlumat veriblər.
Sistem Nəqliyyatı İntellektual İdarəetmə Mərkəzindən idarə olunur. Onun əsas funksiyaları məlumatların toplanması və məlumat bazasının formalaşdırılması, mövcud vəziyyətin təhlili və optimallaşdırılması, məlumatalrın istifadəçilərə ötürülməsi, avtomatik rejimdə göstərişlərin formalaşdırılması və yerinə yetirilməsinin müşahidəsindən ibarətdir.
Nəqliyyatı intelleketual idarəetmə sistemi 4 əsas funksional sistemdən ibarətdir: nəqliyyatın hərəkətinin idarə olunması, ictimai nəqliyyatı idarəetmə, ictimai nəqliyyatın hərəkətinə maneə törədən qeyri-qanuni parklanmanın aradan qaldırılması, nəqliyyat informasiyasının təminatı.
Nəqliyyatın hərəkətinin idarə olunması prosesi 5 sistem vasitəsilə həyata keçirilir: işıqforların idarə olunması sistemi, dairəvi və video aşkarlama sistemi, elektron rəqəmsal tablolar sistemi, müşahidə kameraları sistemi, nəqliyyat informasiyasının ötürülməsi sistemi.
İşıqforların idarə olunması sistemi nəqliyyat axınlarının optimal hərəkətinin təmin edilməsi məqsədilə, nəqliyyat axınlarının sıxlığından asılı olaraq avtomatik rejimdə nəqliyyat siqnallarının idarə edilməsini təmin edir. Fövqəladə və digər hallarda zəruri yolların operativ boşaldılması məqsədilə İntellektual İdarəetmə Mərkəzindən nəqliyyat-siqnal sisteminə müdaxilənin edilməsi mümkündür. Şəhərin 150 yol kəsişməsində xüsusi kontrollerlər quraşdırılıb. Nəqliyyatın intensiv olduğu 37 yol kəsişməsində isə əlavə olaraq aşkaredici halqalar quraşdırılıb.
Dairəvi və video aşkarlama sistemi çərçivəsində paytaxtda 326 videokamera quraşdırılıb. Öz növbəsində, elektron rəqəmsal tablolar sistemi çərçivəsində paytaxtda 48 ədəd tablo quraşdırılıb.
Kamera müşahidə sisteminin təşkili məqsədilə 3024 müşahidə kamerası yerləşdirilib ki, bu da müxtəlif məntəqələrdən görüntüləri təmin edir.
Nəqliyyat informasiyasının ötürülməsi sisteminə elektron mərkəz, mobil telefonlar, TV, radio, elektron rəqəmsal tablo, avtobus dayanacaqlarında quraşdırılan informasiya terminalları və 141 qaynar xətt daxildir.
Bir az əvvəl Nəqliyyat Nazirliyinin mətbuat xidmətinin rəhbəri Namiq Həsənovun Trend-ə bildirdiyi kimi, 2012-ci ilin ikinci yarısından etibarən nəqliyyatı intellektual idarəetmə sisteminin tətbiq edilməsinin ikinci mərhələsinin həyata keçirilməsi çərçivəsində işlərə başlanacaq.
Onun sözlərinə görə, hazırda Bakının nəqliyyat sistemini əhatə edən intellektual idarəetmə sisteminin birinci fazası çərçivəsində nəzərdə tutulan bütün proqramların instalyasiyası üzrə işlər aparılır. İkinci faza Bakının ətraf sahələrini, eləcə də Abşeron yarımadasını əhatə edəcək.
Bu proses başa çatdıqdan sonra artıq ilin ikinci yarısından intellektual idarəetmə sisteminin ikinci fazası üzrə işlər başlayacaq.
Dəyəri 95 milyon dollardan artıq olan nəqliyyatı intellektual idarəetmə sistemi ötən ilin dekabrında işə salınıb. Bütün üç mərhələ işə salındıqdan sonra sistem Bakıdakı mərkəzdən idarə ediləcək. Sistemin yaradılması Bakının küçələrində yerləşdirilən 664 ədəd informasiya terminalı və 48 ədəd informasiya lövhəsinin quraşdırılmasını nəzərdə tuturdu. Sistemin tətbiqi çərçivəsində avtobus dayanacaqları üçün 639-a yaxın, taksilər üçün 140-a yaxın meydançanın yaradılması planlaşdırılırdı.
