Azərbaycan, Bakı, 18 fevral /Trend müxbir N.İsmayılova/
2011-ci ildə Azərbaycanda internet-bankinq xidmətləri vasitəsilə 25,3 milyon manat həcmində 26,6 min əməliyyat keçirilib. Trend-in məlumatına görə, bu barədə şənbə günü Azərbaycan Mərkəzi Bankının (AMB) maliyyə sabitliyi üzrə hesabatında deyilir.
2011-ci ilin dördüncü rübü ərzində internet-bankinq xidmətləri vasitəsilə əməliyyatların həcmi 9,1 faiz artıb, 2010-cu ilin sonuna nisbətdə isə təxminən 3 dəfə azalıb.
2010-cu ilin sonuna olan məlumata görə, 29,98 min əməliyyatın həcmi 75,47 milyon manat təşkil edib.
AMB-nin məlumatına əsasən, 2011-ci ilin sonuna yerli bankların buraxdığı plastik kartların sayı 349 min ədəd artaraq 4,6 milyon ədədə çatıb ki, bu da hər min nəfərə (yetkinlik yaşına çatmış) orta hesabla 757 ödəniş kartı deməkdir.
2011-ci ilin yekunları üzrə ölkədə 2132 bankomat və 13 220 POS-terminal xidmət göstərib. 2011-ci ildə bankomatlar vasitəsilə 6 388 milyon manat həcmində 46 527 milyon əməliyyat aparılıb. POS-terminallar vasitəsilə aparılan əməliyyatların sayı 1837 min, həcmi isə 375 milyon manat təşkil edib.
Fevralın 18-nə olan rəsmi məzənnə 0,7863 AZN/USD təşkil edir.
