Azərbaycan, Bakı, 24 fevral /Trend, müxbir Ə.Həsənov/
2012-ci ilin yanvarında Bakının ilkin mənzil bazarında qiymətlər əvvəlki aylara nisbətən dəyişməyib və 1 kvadratmetrə görə 825,2 manat təşkil edib. Trend-in məlumatına görə, bu barədə cümə günü "Əmlak Bazarı İştirakçıları" İctimai Birliyinin məlumatında deyilir.
Əvvəlki rüblə müqayisədə qiymətlər 1,4 faiz, ötən ilin yanvarına nisbətdə isə 2,7 faiz enib. Böhran dövrünün əvvəli (2008-ci il sentyabr) ilə müqayisədə qiymətlər 30,9 faiz azalıb.
Əvvəlki aylarda olduğu kimi, yanvarda da Bakının ilkin mənzil bazarının monitorinqi 424 yüksəkmərtəbəli yaşayış binasını əhatə edib, tikinti şirkətlərinin sayı isə əvvəlki səviyyədə (151) qalıb.
Əvvəlki aylarda olduğu kimi, yanvar ayında da yeni tikililərdə üçotaqlı mənzillər üstünlük təşkil edib. Yeni tikilidə birotaqlı mənzilin orta hesabla sahəsi 60,7 kvadratmetr, ikiotaqlı - 92,1 kvadratmetr, üçotaqlı - 131,8 kvadratmetr, dördotaqlı - 182,9 kvadratmetr, beşotaqlı isə 238,3 kvadratmetr təşkil edib.