Azərbaycan, Bakı, 7 mart /Trend, müxbir A.Axundov/
Azərbaycan Kənd Təsərrüfatı Nazirliyi 2011-ci ildə alkoqol içkilər, etil spirti və tütün məmulatlarının satışı üçün zəruri sənədlərin mövcudluğu üzrə 56 pərakəndə satış və ictimai-iaşə obyektində monitorinq və yoxlamalar aparıb.
Trend-in məlumatına görə, bu barədə çərşənbə günü kənd təsərrüfatı naziri İsmət Abasovun "Respublika" qəzetində dərc edilən məqaləsində deyilir.
Monitorinqlər Bakının Yasamal rayonu, Gəncə və Mingəçevir şəhərləri, Göygöl, Samux, Şəmkir, Gədəbəy, Quba, Xaçmaz, Qusar, Şabran, Zaqatala və Balakən rayonlarında keçirilib.
"Yoxlamalar zamanı 28 pərakəndə ticarət və ictimai-iaşə obyektlərində alkoqollu içkilərin, etil spirtinin və tütün məmulatlarının satışı üçün lisenziyanın, 46 obyektdə müşayiətedici sənədlərin, 22 obyektdə məhsulların mənşə sertifikatının olmadığı, 5 obyektdə istifadə müddəti başa çatmış pivə məhsullarının satıldığı müəyyən edilib", - məqalədə deyilir.
