Azərbaycan, Bakı, 20 aprel / Trend, müxbir E.İsmayılov /
"Pulkovo Hava Yolları" şirkətinin Sankt-Peterburq - Bakı marşrutu üzrə uçan təyyarəsi ölkə paytaxtına üç saatdan yuxarı gecikmə ilə gələcək. Bu barədə cümə günü Trend-ə Heydər Əliyev Beynəlxalq Aeroportundan məlumat verilib.
Məlumata görə, paytaxta yerli vaxtla saat 12:00-da enməli olan təyyarə yubanma səbəbindən saat 15:20-də çatacaq.
"Təyyarə artıq Sankt-Peterburqdan havaya qalxıb və Bakıya yerli vaxtla saat 15:20-də enəcək", - aeroportdan deyiblər.
Bundan əvvəl "Pulkovo Hava Yolları" aviaşirkətindən Trend-ə bildirmişdilər ki, təyyarə sərnişinlərdən birinin vəziyyətinin pisləşməsi səbəbindən yubanır.