Azərbaycan, Bakı, 18 may /Trend, müxbir A.Axundov/
Azərbaycanın dövlət büdcəsi ölkəyə 2011-ci ildə xarici risk və çağırışlara qarşı dayanmağa imkan verdi. Trend-in məlumatına görə, bu barədə cümə günü Azərbaycan Hesablama Palatasının rəhbəri Heydər Əsədov Milli Məclisin İqtisadi siyasət komitəsinin iclasında 2011-ci il dövlət büdcəsinin icrası haqqında qanun layihəsinin müzakirəsi zamanı bildirib.
"2011-ci ilin büdcəsi ölkədə makroiqtisadi sabitliyin qorunmasına dəstək verdi, hökumətin qarşıya qoyduğu məqsədlərin icrasına kömək etdi, bunun üçün maliyyə təminatı yaratdı", - Əsədov qeyd edib.
Onun sözlərinə görə, ötən il bütün planlaşdırılan sosial tədbirlər və investisiya layihələri tam icra edilib.
"2011-ci ildə sifariş edilib maliyyələşdirilməyən heç bir tədbir və layihə qalmayıb. Bundan başqa, ölkə büdcəsinin imkanları büdcədə nəzərdə tutulmayan sosial layihələri maliyyələşdirməyə imkan verdi. Buna misal kimi, keçmiş Azərbaycan SSR Əmanət Bankının əmanətçilərinə birdəfəlik ödənişlərin həyata keçirilməsini göstərmək olar", - Əsədov qeyd edib.
Onun sözlərinə görə, büdcənin ümumi parametrləri müasir tələblərə cavab verir.
"Avropada büdcə kəsirinin artımı şəraitində Azərbaycan büdcəsi profisitlə icra edilib. Borcalma xarici borcların yuxarı həddinin yarısını da ötməyib. Ölkənin bu sahədə riskə daxil olmamasından isə danışmağa dəyməz", - Əsədov deyib.